Parliament gives dress down to head of Privatization Agency

22 May

Posted by The Ethiopia Observatory

በዮሐንስ አንበርብር*

ፕራይቬታይዜሽን ኤጀንሲ ማስመለስ ባልቻለው ከመቶ ሚሊዮን ብር በላይ ገንዘብ በፓርላማው ተወቀሰ

“ወንበር ለማሞቅ አይደለም… አልቻልንም ብለን እናስረክባለን” የኤጀንሲው ዋና ዳይሬክተር

የሕዝብ ተወካዮች ምክር ቤት የመንግሥት ወጪ አስተዳደር ቋሚ ኮሚቴ ከመቶ ሚሊዮን ብር በላይ የሆነ የመንግሥትን ገንዘብ ማስመለስ ባልቻለው የፕራይቬይታይዜሽንና የመንግሥት ልማት ድርጅቶች ተቆጣጣሪ ኤጀንሲ ኃላፊዎችን በመጥራት ወቀሰ፡፡

የኤጀንሲው ዋና ዳይሬክተር አቶ በየነ ገብረ መስቀል በቀረበባቸው ወቀሳ በሰጡት ምላሽ፣ “የተቀመጥነው ወንበር ለማሞቅ አይደለም” በማለት ማስፈጸም ካልቻሉ በግልጽ ተናግረው ኃላፊነት እንደሚለቁ ምላሽ ሰጥተዋል፡፡

ቋሚ ኮሜቴው ባለፈው ሳምንት ኃላፊዎቹን ጠርቶ ያነጋገረበት ዋነኛ ምክንያት የፌዴራል ዋና ኦዲተር የ2004 ዓ.ም. የኦዲት ሪፖርት ባቀረበበት ወቅት፣ በኤጀንሲው ላይ ያስተዋላቸውን ችግሮችና ለዓመታት ያልታሰበ ከመቶ ሚሊዮን ብር በላይ ያልተሰበሰበ የመንግሥት ገንዘብን መሠረት በማድረግ ነው፡፡

በኪራይና በጋራ ልማት የሚያዙ የመንግሥት ድርጅቶች በውል ዝግጅት ላይ ኤጀንሲው ችግሮች እንዳሉበት፣ የመንግሥት ድርጅቶችን በኪራይ ወይም በግዥ የሚወስዱ የግል ድርጅቶች የኋላ ታሪክን ሳያጠና በማስረከብ መንግሥት ላይ ጉዳት ማድረስ የሚሉት በኦዲት የተገኙ ናቸው፡፡

በ1992 ዓ.ም. የአርባ ምንጭ ጨርቃ ጨርቅን ተከራይቶ የነበረው አቲለይል ድሪም የተባለ የውጭ ኩባንያ ያለበት 25.6 ሚሊዮን ብር፣ እስከ ታኅሣሥ ወር 2005 ዓ.ም. ድረስ ናርን አርሚ ቴክስታይል ግሩፕ የተባለ ኩባንያ ደግሞ በገባው ውል መሠረት መክፈል የሚገባው 760 ሺሕ ዶላር ሳይሰበስብ፣ በ2001 ዓ.ም. ውሉ መቋረጡና ገንዘቡ እስካሁን አለመከፈሉ የኦዲትቱ ይገልጻል፡፡

ይኸው ናርን አርሚ ቴክስታይል ግሩፕ የተባለው ድርጅት በ1998 ዓ.ም. ተከራይቶት የነበረውን የሐዋሳ ጨርቃ ጨርቅ ፋብሪካ በገባው ውል መሠረት መምራት ባለመቻሉ ምክንያት ውሉ እንዲቋረጥ መደረጉ፣ ነገር ግን ኩባንያው ለተጠቀመበት የመንግሥት ሀብት በድምሩ 72 ሚሊዮን ብር ዕዳ እንዳለበት በንብረት ርክክብ ወቅት የታየ ቢሆንም፣ ገንዘቡ እስካሁን ገቢ አለመሆኑ ዋነኞቹ ናቸው፡፡

ለእነዚህና ለሌሎች ዋና ዋና ችግሮች መልስ እንዲሰጡ የተጠሩት የኤጀንሲው ኃላፊዎች ለሚቀርቡላቸው ጥያቄዎች ይሰጡ የነበረው ምላሽ ኃላፊነትን መሸሽ አድርገው የወሰዱት የቋሚ ኮሚቴው ሰብሳቢ አቶ ተሾመ እሸቱ፣ ተገቢ ባልሆኑ ምክንያቶች የታዩትን ችግሮች ለመሸፈን መሞከር ተገቢ አለመሆኑን በመግለጽ ዋና ዳይሬክተሩን አቶ በየነን ወቅሰዋል፡፡

ማይክራፎን ሲይዙ መናገር መቻልና ሥራን መሥራት የተለያዩ መሆናቸውን በመጥቀስ የታዩትን ችግሮች ለመቅረፍ አሁን ምን እየተሠራ መሆኑን በትክክል እንዲያስረዱ መመርያ አዘል አስተያየት ሰጥተዋል፡፡

ጠንከር ያለ የተጠያቂነት ውይይት በታየበት በዚህ ስብሰባ ላይ መልስ የሰጡት የኤጀንሲው ዋና ዳይሬክተር በኃላፊነት የተቀመጡት ወንበር ለማሞቅ እንዳልሆነ በመግለጽ ለወቀሳው ምላሽ ለመስጠት ሞክረዋል፡፡

“አሁንም ሆነ ኃላፊነቱን ስንወስድ የነበረን እምነት በቻልነው መጠን ኃላፊነትን ለመወጣት ነው፡፡ ወንበር ለማሞቅ አይደለም የተቀመጥነው፡፡ ዕርዳታ ስንፈልግ እንጠይቃለን ካልቻልን ደግሞ ተረከቡን እንላለን፤” ብለዋል፡፡

በኦዲት ግኝቱ ለተነሱት ችግሮች በቀጥታ መልስ እንዲሰጡ በተቀመጠው አቅጣጫ መሠረትም ምላሽ ሰጥተዋል፡፡ በዚህ መሠረት ከላይ የተጠቀሱት ሁለት የውጭ ኩባንያዎች ያለባቸውን የመንግሥት ዕዳ ለማስመለስ ውሳኔ እየተጠበቀ መሆኑንና በዚህ ወር መጨረሻ ውሳኔ እንደሚሰጥበት አስታውቀዋል፡፡ ኩባንያዎቹ አገር ጥለው የሄዱ በመሆኑም ከውጭ ጉዳይ ሚኒስቴር ጋር በመሆን ባለሀብቶቹን ለመጠየቅ እንቅስቃሴ መጀመሩን ገልጸዋል፡፡

ሌሎች ያልተሰበሰቡ ገንዘቦች በአሁኑ ወቅት እየተሰበሰቡ መሆኑን ያስረዱ ሲሆን፣ ኤጀንሲው ጉድለት የለበትም ብለው እየተከራከሩ አለመሆኑንና ይህንን ጉድለት ለማስተካከል ጥረት እየደረገ እንደሆነ አስረድተዋል፡፡ ቋሚ ኮሚቴው በተሰጠው ማብራርያ ላይ ኤጀንሲው ጉድለቱን እንዲያርም አስተያየት በመስጠት ወደፊት የደረሰበትን ደረጃ በቀጣይ እንደሚመለከት አስታውቋል፡፡

*ሪፖርተር

%d bloggers like this: