Labor leaders give PM earful about difficulty in Ethiopia of freely organizing & negotiating to ensure respect for legally & internationally recognized rights

2 Jan

Posted by The Ethiopia Observatory
Source: Ethiopian News Agency (ENA)

የኢትዮጵያ ሠራተኛ ማህበራት በነፃ የመደራጀትና የመደራደር መብቶች የተገደቡ መሆናቸውን የሠራተኞች ማኅበራት ኮንፍ አስታወቀ

መንግሥት የሠራተኞችን መብት ሊያስጠብቁ የሚችሉ እርምጃዎችን ደረጃ በደረጃ እየተገበሩ ቢሆንም የሠራተኞች በነፃ የመደራጀትና የመደራደር መብት ያለመከበር ችግሮች እንዳሉ የኢትዮጵያ ሠራተኛ ማህበራት ኮንፌዴሬሽን አስታወቀ። የሠራተኛውን በነፃ የመደራጀትና የመደራደር እንዲሁም ሌሎች ችግሮችን ለመፍታት በሚቻልበት ዙሪያ በመጪው ቅዳሜ ታህሳስ 26 ቀን 2006 ዓ.ም ከጠቅላይ ሚኒስትር ኃይለማርያም ደሳለኝ ጋር ውይይት ያካሂዳል።

የኮንፌዴሬሽኑ ፕሬዝዳንት አቶ ካሣሁን ፎሎ ዛሬ ለጋዜጠኞች በሰጡት መግለጫ እንዳሉት አገሪቱ በአጭር ጊዜ ፈጣን ዕድገት በማስመዝገብ ከግብርና ወደ ኢንዱስትሪ መር ኢኮኖሚ ሽግግር በማድረግ ላይ ትገኛለች።

ለዚሁ ሲባል በተፈጠረው ምቹ ሁኔታም ኢንቨስትመንት እየተስፋፋና በዛው መጠን ደግሞ የሠራተኛው ቁጥር በከፍተኛ ሁኔታ እየጨመረ መሆኑን ገልጸዋል።

ከዚሁ ጋር ተያይዞ እየተስፋፋ ያለውን ኢንዱስትሪና በኢንዱስትሪዎች ውስጥ የተሰማራውን የልማት ኃይል በአግባቡ መምራትና የተረጋጋ የኢንዱስትሪ ሠላም በመፍጠር አሰሪው፣ ሠራተኛውና መንግሥት ተጠቃሚ እንዲሆኑ ለማድረግ የጋራ ርብረብ አስፈላጊ ነው ብለዋል።

ኢትዮጵያ በፈረመቻቸውና ባጸደቀቻቸው መሰረታዊ ስምምነቶች የሠራተኛውን የመደራጀት እንዲሁም የመደራደርና ሌሎች መብቶች የአገሪቱ የህግ አካል እንደሆኑ በሕገ-መንግሥቱ መደንገጉንና ይህንኑ የተወሰኑ ጉድለቶች ቢኖሩትም የአሠሪና ሠራተኛ አዋጅ ወጥቶ በሥራ መዋሉን አስታውሰዋል።

የሠራተኛ መብቶችን ከመደንገግና ዓለም አቀፍ ስምምነቶችን ከመፈረም በላይ መብቱን ሊያስጠብቁ የሚችሉ ተጨባጭ እርምጃዎች ደረጃ በደረጃ ተግባራዊ በመሆን ላይ መሆናቸውን አቶ ካሣሁን ተናግረዋል።

ሆኖም አበረታች በጎ ጎኖችና ህጎች ቢኖሩም የሠራተኛውን መብትና ጥቅም ከማስጠበቅ አንፃር አሁንም ችግሮች እንዳሉም ጠቁመዋል።

ከችግሮቹ መካከልም በዋነኝነት በማህበር የመደራጀትና የመደራደር መብትን የጠቀሱ ሲሆን የሙያ ደህንነትና ጤንነት፣ የፍትህ መጓተትና መጓደል፣ የሙስና፣ የዓለም አቀፍ ሕጎች አተረጓጎምና ሌሎች ጠቅሰዋል።

በመሆኑም ጥያቄዎቹን መሰረት በማድረግ ችግሮቹ በሚፈቱበት ሁኔታ ላይ በመጪው ቅዳሜ ከጠቅላይ ሚኒስትር ኃይለማርያም ደሳለኝ ጋር ውይይት ይካሄዳል ብለዋል። ከውይይቱም ከጠቅላይ ሚኒስትሩ ጋር በዓመት ሁለት ጊዜ መገናኘት የሚቻልበት ቋሚ መድረክ እንዲሁም አገር አቀፍ የሦስትዮሽ መድረክ የሚቋቋምበት ሁኔታም ይመቻቻል የሚል እምነት እንዳለ ነው ያስረዱት።

የኮንፌዴሬሽኑ ምክትል ፕሬዝዳንት አቶ ዘነበ ከበደ በዚሁ ጊዜ እንደተናገሩት በአገሪቱ በማህበር ያልተደራጀ 2 ነጥብ 2 ሚሊዮን ሠራተኛ በአገሪቱ ይገኛል።

እንደ አቶ ዘነበ አገላለጽ በማህበር ያልተደራጀ፣ የሙያ ደህንነቱና ጤንነቱ ያልተጠበቀና መብቱ ያልተደራጀ ሠራተኛ ስራውን በአግባቡ ሊሰራና በብዛትና በጥራት አምርቶ ምርታማነትን ሊያሳድግ አይችልም።

ይህ ሁኔታ ደግሞ በተለይም በአገሪቱ ለተያዘው ከግብርና ወደ ኢንዱስትሪ መር ኢኮኖሚ የመሸጋገር ዕቅድ እንቅፋት የሚፈጥር በመሆኑ ውይይቱ ወቅቱን የጠበቀና መፈትሄም የሚያሻ እንደሆነ ነው ያመለከቱት።
 

%d bloggers like this: