የኢትዮጵያ የሣይበር ጥቃት መካላከል አቅም አስተማማኝ ደረጃ ላይ መድረሱ ተገለጸ – ይህ ምጥቀት ዜጎችን መሰለልን መጨመሩ አልታወቀም!

18 May

Posted by The Ethiopia Observatory
 

    ☢     በመከናወን ላይ ያሉት ሥራዎች ስኬታማነት በተጨባጭ ተረጋግጧል

    ☢     ኢንሣ በዓለም ገበያ ላይ የሚገኙትን የኤሌክትሮኒክስ መልዕክት መለዋወጫ ቴክኖሎጂዎች
            በስፋት ይጠቀማል

    ☢     “ዳጉ” የተሰኘው አዲስ ቴክኖሎጂ በአሁኑ ወቅት ሥራው ተጠናቆ በሙከራ ትግበራ ላይ
            እንደሚገኝና በ2007 ዓ.ም መጀመሪያ ሙሉ በሙሉ ሥራ ላይ እንደሚውል ተገልጿል

    ☢     በሌሎች አገራት ይሰራ የነበረውን ካርታ የራሱን ባለሙያዎችና ካሜራ በመጠቀም ለመጀመሪያ       ጊዜ ኢንሣ ለ23 ከተሞች ዲጂታል ካርታ አዘጋጀቷል

 

አዲስ አበባ ግንቦት 10/2006 (ኢዜአ) ኢትዮጵያ በተለያዩ ጊዜያት የሚሰነዘሩባትን የሳይበር ጥቃቶች የመመከት አቅሟ በአስተማማኝ ሁኔታ እየዳበረ መምጣቱን የኢንፎርሜሽን መረብ ደህንነት ኤጀንሲ (ኢንሳ) – [Information Network Security Agency – INSA] አስታወቀ።

የአገርና የህዝብ ቁልፍ መረጃዎች ምስጢርነታቸው እንዲጠበቅ እየገነባ ያለው “ዳጉ” የመረጃ ልውውጥ ሥርዓት በቀጣዩ ዓመት ሥራ ይጀምራል።

የኤጀንሲው ዋና ዳይሬክተር ብርጋዴር ጀነራል ተክለብርሃን ወልደአረጋይ ከኢትዮጵያ ዜና አገልግሎት ጋር ባደረጉት ቃለ ምልልስ ኢትዮጵያ እያስመዘገበች ካለችው ሁለንተናዊ ዕድገት ባሻገር በቴክኖሎጂውም ጠንካራ መሰረት በመገንባት ላይ ትገኛለች።

ቴክኖሎጂው ለአገሪቱ ዕድገት መሰረት ለሆኑት ግብርና እና ኢንዱስትሪ አቅም የሚፈጥር ብቻ ሳይሆን ዓለም አቀፍ ተወዳዳሪነቷን ማረጋገጥ የሚያስችል ራሱን የቻለ ኢንዱስትሪም ነው።

በመሆኑም በዘርፉ የተጣለውን መሰረት በአስተማማኝ ሁኔታ የመገንባት ሥራዎች በመከናወን ላይ ሲሆኑ ስኬታማነታቸው በተጨባጭ መረጋገጥ መቻሉን ነው ዋና ዳይሬክተሩ ያስረዱት።

በተለይም ከአገሪቱ ፈጣን ዕድገት ጋር ተያይዞ በስፋት እየተገነቡ ባሉ የመሰረተ ልማት ሥራዎች ላይ የሚሰነዘሩ ጥቃቶችን የመመከት አቅም ዳብሯል ይላሉ።

የሳይበር ጥቃት ባልታወቁ ግለሰቦች አሊያም ድርጅቶች አማካይነት በኮምፒዩተር የመረጃ ሥርዓት፣ በመሰረተ ልማቶችና በኔትዎርኮች ላይ የሚፈጸም የማመሰቃቀል፣ የማዛባትና ሥርዓቱን የማበላሸት ብሎም የማጥፋት ጥቃት ነው።

የኢንሣ ዋና ዳይሬክተር ብርጋዴር ጀነራል ተክለብርሃን ወልደአረጋይ (ፎቶ ኢዜአ)

የኢንሣ ዋና ዳይሬክተር ብርጋዴር ጀነራል ተክለብርሃን ወልደአረጋይ (ፎቶ ኢዜአ)

የችግሩ ስፋት የመንግሥት መሥሪያ ቤቶች በተለይም የጥናትና ምርምር ተቋማት ድረ-ገጾች አገልግሎት እንዳይሰጡ ከመቁረጥ አንስቶ ግዙፍ የመሰረተ ልማት ማስተላለፊያዎችን በቫይረስ እንዲጠቁ በማድረግ ሥርዓቱን እስከማወክ ይደርሳል።

በየዕለቱ አዳዲስ ለውጦች በሚታዩበት ቴክኖሎጂ ጥቃቱም የለውጡን ያህል ፈጣንና ተለዋዋጭ ቢሆንም ሁሉንም ማክሸፍ የሚያስችል አቅም መገንባቱን በተግባር ማረጋገጥ ተችሏል ብለዋል።

ኤጀንሲው እስካሁን ያልነበሩና ወደፊት ሊከሰቱ የሚችሉ ከባድ የሳይበርና የመሰረተ ልማት የጥቃት ሙከራዎችን ጭምር ይበልጥ የመመከት አቅሙን ለማዳበር እየሰራ መሆኑን ነው ብርጋዴር ጀነራል ተክለብርሃን ያስረዱት።

በአሁኑ ወቅት የመንግሥት ተቋማት በዓለም ገበያ ላይ የሚገኙትን የኤሌክትሮኒክስ መልዕክት መለዋወጫ ቴክኖሎጂዎች በስፋት እንደሚጠቀሙ ዳይሬክተሩ ጠቅሰዋል።

ይህ ደግሞ አገራዊ መረጃዎች በሌሎች እጅ እንዲገቡ አሉታዊ አስተዋጽኦ ያለው በመሆኑ ኢንሳ የመንግሥት ተቋማት የራሳቸው የመረጃ ልውውጥ ሥርዓት /ኢ-ሜይል/ እንዲኖራቸው የማድረግ ሥራ እያከናወነ ይገኛል።

ከአፋር ባህላዊ የመረጃ ልውውጥ ሥርዓት ስያሜውን ያገኘው “ዳጉ” የተሰኘው ይኸው አዲስ ቴክኖሎጂ በአሁኑ ወቅት ሥራው ተጠናቆ በሙከራ ትግበራ ላይ እንደሚገኝና በ2007 ዓ.ም መጀመሪያ ሙሉ በሙሉ ወደ ሥራ እንደሚገባ ተናግረዋል።

የቴክኖሎጂው እውን መሆን ምስጢራዊ መረጃዎችን ከመጠበቅ ባለፈ ኢትዮጵያ በቴክኖሎጂው ዓለም የራሷ እሴት፣ ቋንቋና ባህልን ታሳቢ ያደረገ ሥርዓት እንዲኖራት የሚያስችል እንደሆነ ነው ዋና ዳይሬክተሩ ያመለከቱት።

በኢ-ሜይል የተጀመረው ይኸው ሥራ በሌሎች የመረጃ መስኮችም እንደሚቀጥል ብርጋዴር ጀነራል ተክለብርሃን አስታውቀዋል።

የኢንሳ ዋነኛ ተግባር የቴክኖሎጂውን ጤንነት የሚያስጠብቁ ሥርዓቶች በመቀየስ የአገሪቱን የመረጃ ደህንነትና የመሰረተ ልማት አውታሮችን ከስጋት መጠበቅ ቢሆንም ከዚህ ጎን ለጎን በሚያከናውናቸው ሌሎች ተልዕኮዎቹም ውጤታማ መሆኑን ጠቁመዋል።

ዘርፉን የሚደግፉ የፖሊሲ ማዕቀፎችን ከማዘጋጀት ባሻገር ቀደም ሲል በሌሎች አገራት ይሰራ የነበረውን ካርታ የራሱን ባለሙያዎችና ካሜራ በመጠቀም ለመጀመሪያ ጊዜ ለ23 ከተሞች ዲጂታል ካርታ ማዘጋጀቱን ገልጸዋል።

ከተቋቋመ ሰባት ዓመታትን ያስቆጠረው የኢንፎርሜሽን መረብ ደህንነት ኤጀንሲ /ኢንሳ/ ግንቦት 20 ካስገኛቸው ፍሬዎች አንዱ ነው ያሉት ብርጋዴር ጀነራል ተክለብርሃን ዓለም በዘርፉ የደረሰበት ደረጃ ላይ ለመድረስ እየሰራ ይገኛል ብለዋል።

በአገሪቱ በሚገኙ የገንዘብ፣ የኤሌክትሪክ ኃይልና የቴሌኮም ተቋማት ላይ የሚደርሱ ጥቃቶችን ኢንሳ በመከላከል በኩል ከፍተኛ ሚና እየተወጣ ይገኛል፡፡
 

%d bloggers like this: