በጋምቤላ ግጭት የተጠረጠሩ ባለስልጣናት በቁጥጥር ስር እየዋሉ ነው፤ የመሬት ዘረፋው ያስከተለው የሟቾች ብዛት እየጨመረ ነው

23 Sep

Posted by The Ethiopia Observatory (TEO)

በጋምቤላ ብሔራዊ ክልላዊ መንግስት በጎደሬ ወረዳ፣ በመዠንገር ዞን በተቀሰቀሰውና አሁንም ድረስ በአንዳንድ ቦታዎች በቀጠለው ግጭት እጃቸው እንዳለበት የተጠረጠሩ የክልሉ ባለስልጣናት ያለመከሰስ መብታቸው ተነስቶ በቁጥጥር ስር እየዋሉ ነው፡፡ በአዲስ አመት ዋዜማ የተቀሰቀሰውና ከ40 በላይ ሰዎችን ህይወት የቀጠፈው ግጭት መነሻ ከመሬት ባለቤትነት ጋር የተያያዘ እንደሆነ ለአዲስ አድማስ የገለፁት ምንጮች፤ “ደገኞች መሬታችንን ይልቀቁ” የሚሉ የአካባቢው ተወላጆችና አንዳንድ የክልሉ ባለስልጣናት በመንግስት ተግባራዊ እየተደረገ ያለውን የሰፈራ ፕሮግራም ተገን በማድረግ ነባር ይዞታ ያላቸውን ነዋሪዎች በማፈናቀላቸው ግጭቱ መፈጠሩን ተናግረዋል፡፡

በአካባቢው ተወላጆችና ከሌሎች አካባቢዎች በመጡ ነዋሪዎች መካከል ለረጅም ጊዜ የቆየና በየጊዜው የሚያገረሽ ግጭት እንዳለ የሚታወቅ ሲሆን፣ በቅርቡ የተከሰተው ግጭት ሊቀሰቀስ እንደሚችል የፌደራል መንግስት በደረሰው መረጃ መሰረት፣ በአፈ ጉባኤ ካሳ ተክለብርሀን የተመራ ቡድን ከክልሉ ከፍተኛ ባለስልጣናት ጋር በመተባበር በአካባቢው የማረጋጋት ስራ ቢሰራም፣ በዞኑ ያሉ አንዳንድ የፖሊስና የሚሊሺያ አባላት “መሬታችንን ይልቀቁ” የሚለው ሃሳብ እንዲሰርፅ በማድረጋቸው ግጭቱ እንደተፈጠረ ምንጮቻችን ጠቁመዋል፡፡

ግጭቱ ከተፈጠረ በኋላም የዞኑን የፖሊስ ልዩ ሀይል አዛዥ ጨምሮ የፖሊስና የሚሊሽያ አባላት ሸፍተው ጫካ መግባታቸውን የተናገሩት ምንጮች፤ በአሁኑ ወቅት አዛዡና ሌሎች ጥቂት አባላት እጃቸውን ለመንግስት ሃይሎች እንደሰጡ ገልፀዋል፡፡ በአካባቢው የተከሰተው ግጭት ሁነኛ መፍትሔ ካልተበጀለት፣ በአቅራቢያ ወደሚገኙ ሌሎች አካባቢዎች ሊዛመት ይችላል የሚል ከፍተኛ ስጋት መፈጠሩን ያመለከቱት ምንጮቹ፤ ከወራት በፊት ማንነታቸው ያልታወቀ የታጠቁ ሰዎች ዲማ ተብሎ በሚጠራው የክልሉ አካባቢ አስር ሰላማዊ ዜጎችን ገድለው መሰወራቸውን ገልፀዋል፡፡ በአካባቢው የተከሰተው ግጭት ከክልሉ የፀጥታ ሃይሎች ቁጥጥር በላይ በመሆኑ፣ የፌደራል ፖሊስና የመከላከያ ሃይል ጣልቃ ገብቶ የማረጋጋት ስራ እየሰራ እንደሚገኝ ለማወቅ ተችሏል፡፡
/አዲስ አድማስ
 

በጋምቤላ ግጭት እንደገና ማገርሸቱ ተሰማ

መስከረም ፱ ቀን ፳፻፯ ዓ/ም ኢሳት ዜና:-የኢሳት የአካባቢው ምንጮች እንደገለጹት ለቀናት ጋብ ብሎ የቆየው ግጭት ከትናንት ጀምሮ እንደገና አገርሽቷል። የክልሉ ፕሬዚዳንት አቶ ጋትሉዋክ ቱት የገዢው ፓርቲ ልሳን ለሆነው ፋና ሬዲዮ” ኪራይ ሰብሳቢዎችና የመሬት ደላሎች በጠነሰሱት ሴራ ለዘመናት ተቻችሎ የኖረውን ህዝብ ለመከፋፈል ጥረት በማድረጋቸው መስከረም አንድ በሚጤ ከተማ በተፈጠረው ግጭት 13 ሰዎች” መሞታቸውን፣ በገጠር ቀበሌዎችም ተመሳሳይ ግጭት ተከስቶ ቁጥሩ ያልታወቀ ሰዎች መሞታቸውን ተናግረዋል።

አቶ ጋትሉዋክ የመሬት ደላሎች ያሉዋቸውን በስም ከመጥቀስ ተቆጥበዋል፣ ይሁን እንጅ ኢሳት የቀድሞ የህወሃት የጦር መኮንኖች በአካባቢው ሰፋፊ የእርሻ መሬቶችን እየገዙ የመዠንገር ብሄረሰብ ተወላጆችን እያፈናቀሉ መሆኑ ለአሁኑ ግጭት መቀስቀስ ዋነኛው መንስኤ መሆኑን የአካባቢውን ሰዎች በማነጋገር መዘገቡ ይታወሳል።

የክልሉ ፕሬዚዳንት ግጭቱ መብረዱንና የተፈናቀሉ ነዋሪዎች ወደ ቀያቸው መመለሳቸውን ቢገልጹም ፣ ዛሬ ለኢሳት የደረሰው መረጃ ግጭቱ በገጠር ቀበሌዎች ካለፉት ሁለት ቀናት ጀምሮ መቀጠሉንና በርካታ ሰዎች መሞታቸውን ያመለክታል። በአካባቢው ኢንቨስትመንት የነበራቸው 2 የቴፒ ባለሃብቶች ትናንት መገደላቸውን ለማወቅ የተቻለ ሲሆን፣ የሞቱ በርካታ ሰዎች አሁንም ጫካ ውስጥ ተጥለው እንደሚገኙ ምንጮች ገልጸዋል።

ኢሳት ከገለልተኛ ወገን ማጣራት ባይችልም፣ የአካባቢው ነዋሪዎች ግን የሟቾችን ቁጥር ከመቶ በላይ ያደርሱታል። እነዚህ ሰዎች እንደሚሉት በርካታ አስከሬን በየጫካው ተጥሎ ከመገኘቱም በላይ ታጣቂዎችን በመፍራት እስካሁን ለመሰብሰብ አልተቻላም። መንግስት በቅርቡ የአካባቢውን የጸጥታ ሹም በቁጥጥሩ ስር ማዋሉ ይታወቃል።

የአንዋ ሰርቫይቫል ዳይሬክተር አቶ ኒክ ኦቻላ፣ መንግስት ምርጫ ሲቀርብ ብሄረሰቦችን እርስ በርስ ማጋጨት የተለመደ ተግባሩ መሆኑን በመግለጽ ለግጭቱ መቀስቀስ መንግስትን ተጠያቄ አድርገዋል። መንግስት የቀየሰው የመሬት ወረራ ፖሊስም ለግጭቱ አስተዋጽኦ ማድረጉን ዳይሬክተሩ ተናግረዋል። የአካባቢው ነዋሪዎች ግጭቱ በቀላሉ ይፈታል ብለው እንደማያምኑ ይናገራሉ።
 

%d bloggers like this: