Are those Ethiopian mourners being so cruelly clubbed ? It says a lot why Ethiopians continually flee their Motherland & risk their lives – a people who have no stake in the nation’s affairs & its baskets!

23 Apr

Posted by The Ethiopia Observatory (TEO)


 

Did the TPLF commando think he saw an ISIL fighter? Regime's hired commando attacking a young man in  Ramboesque  manner in defense of its employer (Foto Negere Ethiopia).

Did the TPLF commando think he saw an ISIL fighter? A member of the Agazi commandos, the butchers that have been killing Ethiopians all over around, now attacking a young man in Ramboesque manner to ensure continued survival of his employer (Foto Negere Ethiopia).


 
=============

Perfect picture of state violence!


 
==============

ከሰማያዊ ፓርቲ የተሰጠ መግለጫ*

መንግስታዊ ሽብር የህዝብን ቁጣ ያባብሳል እንጂ መፍትሔ አይሆንም!

negre ethiopia

ዛሬ ሚያዝያ 14 ቀን 2007 ዓ.ም የተወካዮች ም/ቤት የጠራውን ሰላማዊ ሰልፍ ተከትሎ ሰማያዊ ፓርቲ ሰልፉን እንደሚደግፍ እና ደጋፊዎቹና አባላቱ በሰልፉ ላይ እንዲገኙ በትናንትናው እለት ጥሪ ማስተላለፉ ይታወሳል፡፡ ይህን ተከትሎም እንደማንኛውም ዜጋ በሰልፉ ሊገኙ የሄዱ የፓርቲው አመራሮች እና አባላት ገና ወደ መስቀል አደባባይ ከመድረሳቸው በፊት እየታደኑ የታሰሩ ሲሆን የተቀሩት ደግሞ ሰልፉን ለመሳተፍ በቦታው ተገኝተው ነበር፡፡

ሰልፉ በርካታ ዜጎች በቁጭት እና በሃዘን የተገኙበት መሆኑንም ሁሉም ሰው የሚገነዘበው ነው፡፡ በዚህ ሁኔታ ውስጥ የነበሩ የሰልፉ ተካፋዮች ተቃውሟቸውን ንግግር በሚያደርጉ ሰዎች ላይ በማሰማት ገለፁ፡፡ ይህን ተከትሎም ፕሮግራሙን በችኮላ ያጠናቀቀው መንግስት ሰልፈኛው እንዲበተን መልዕክት በማስተላለፉ የተቆጡ ዜጎች ጋር ግጭት ፈጠረ፡፡

ለህዝብ ቁጣ እና ተቃውሞ ክብር እና ተገቢውን መልስ የማይሰጠው መንግስት በዜጎች ላይ የወሰደው የጭካኔ እርምጃ በእጅጉ የሚያሳዝን እና በጥብቅ ሊወገዝ የሚገባ ነው፡፡ በእርግጥ ስርዓቱ ለዚህ መሰሉ የሀይል እና የጭካኔ እርምጃ አዲስ ባይሆንም የአሁኑ ግን የተለየ የሚያደርገው ማንም ሰው ሊጠብቀው እና ሊያስበው በማይችለው መልኩ በወገኖቻችን ሞት እና በመንግስት ቸልተኝነት ልቡ ያዘነውን እና ተቃውሞ በማሰማት ላይ የነበረውን ህዝብ “ሰልፍ አልቋል ተበተኑ” በሚል ሰበብ የወሰደው እርምጃ በሀዘናችን ላይ ሀዘን መደረቡ ነው፡፡

በእለቱ ከተፈፀሙት አስከፊ ሁኔታዎች የባሰው ግን መንግሰት የወሰደውን እርምጃ ለመካድ እና በህዝብ የደረሰበትን ከፍተኛ ተቃውሞ ለመደበቅ የህዝብን ቁጣና ሀዘን የሰማያዊ ፓርቲ የፖለቲካ አጀንዳ እንደሆነ አድርጎ በኮምኒኬሽን ፅህፈት ቤት በኩል የወጣው መግለጫ ይዘት ነው፡፡ በዚህ መግለጫ እንደተገለፀው በመስቀል አደባባይ የተገኙ ዜጎች ማሰብ የማይችሉና በነሲብ እንደሚነዱ ሁሉ “ሰማያዊ ፓርቲ ለአመፅ አነሳሳቸው” ማለት ሀዘን የገባውን እና የተቆጣን ህዝብ መሳደብ ነው፡፡ ህዝብን መናቅ ነው፡፡ ከአንድ መንግስት ነኝ የሚል አካል የሚጠበቀውን ኃላፊነት ከመውሰድ እና ተቃውሞዎችን በአግባቡ ከመፍታት ጋር የማይተዋወቀው የኢህአዴግ ስርዓት ቁጣቸውን በገለፁ እና መንግስት በዜጎች ላይ በተደጋጋሚ የሚያሳየውን ቸልተኝነት በተቃወሙ ዜጎች ላይ የወሰደው የጭካኔ እርምጃ ሳያንስ ከአንድ የፖለቲካ ድርጅት ጋር አዛምዶ ተቃውሟቸውን ማጠልሸት በፍፁም ተቀባይነት የሌለው አፀያፊ ተግባር ነው፡፡ መንግስት ነኝ ከሚል አካል በፍፁም የማይጠበቅ ስህተት ነው፡፡ አዲስ አለመሆኑ እና መደጋገሙ ደግሞ እጅግ እንድናዝን ያስገድደናል፡፡

Credit: Yoni Cuba


ከራሱ ታሪክ እና ተሞክሮ መማር ያልቻለው የኢህአዴግ ስርዓት በተደጋጋሚ የሚፈፅማቸው የመብት ጥሰቶች እና ተቃውሞን በሀይል ለመፍታት የሚወስደው እርምጃም ችግርን፣ ቁጣን ከማባባስ በስተቀር መፍትሔ ካለመሆኑም በላይ በሰላማዊ መንገድ የስልጣን ሽግግር እንዲካሄድ እና የአመፅና የጦርነት አዙሪት እንዲከስም ጭቆናን ተቋቁመን የምናደርገውን ትግል ለማኮላሸት መሞከሩ የከፋ አደጋ እንዳለው ለማስገንዘብ እንወዳለን! የህዝብን ጥያቄ ያለፍርሃት በማንሳት እና ተቃውሞ በማሰማታችን እየደረስብን ያለውን አፈና ችለን በምናደርገው ትግል ውስጥ እንዲህ መሰሉ የስም ማጥፋት ዘመቻና የፈጠራ ክስ ይበልጥ ትግሉን እንደሚያጠናክረውም እናስገነዝባለን!

በተያያዘም ዛሬ በተጠራው ሰልፍ ለመካፈል ሲሄዱ የታሰሩ፤ መንግስት በወሰደው የሀይል እርምጃ የታሰሩ እና የታሰሩትን ለመጠየቅ እስር ቤት ሄደው በዛው የታሰሩ የሰማያዊ ፓርቲ አባላት ስም ዝርዝር የሚከተለው ነው (እነዚህ እስካሁን በእርግጠኝነት ማጣራት የቻልነው ብቻ መሆኑ ይታወቅ)፡-

1- ወይንሸት ሞላ – የድርጅት ጉዳይ አባል (ወደ ሰልፉ በመሄድ ላይ ሳለች ከጠዋቱ 3፡00 ሰዓት እስጢፋኖስ አካባቢ ተይዛ ታስራለች)

2- ጠና ይታየው – የ2007 ሀገራዊ ምርጫ የተ/ም/ቤት ተወዳዳሪ (በሀይል እርምጃው ወቅት ተደብድቦ የታሰረ)

3- ኤርምያስ ስዩም – የፓርቲው አባል (በሀይል እርምጃው ወቅት ተደብድቦ የታሰረ)

4- ማስተዋል ፈቃዱ – የፓርቲው የቂርቆስ ክ/ከተማ አስተባባሪ (በሀይል እርምጃው ወቅት ተደብድቦ የታሰረ)

5- ዳንኤል ተስፋዬ – የፓርቲው የጉለሌ ክ/ከተማ አስተባባሪ (በሀይል እርምጃው ወቅት ተደብድቦ የታሰረ)

6- ቴዎድሮስ አስፋው – የአዲስ አበባ ምርጫ ጉዳይ ኮሚቴ ህ/ግንኙነት (በሀይል እርምጃው ወቅት ተደብድቦ የታሰረ)

7- እስክንድር ጥላሁን – የ2007 ሀገራዊ ምርጫ የተ/ም/ቤት ተወዳዳሪ (የታሰሩትን ለመጠየቅ ምግብ ይዞ በሄደበት የታሰረ)

8- ይድነቃቸው አዲስ – የ2007 ሀገራዊ ምርጫ የተ/ም/ቤት እጩ ተወዳዳሪ (የታሰሩትን ለመጠየቅ ምግብ ይዞ በሄደበት የታሰረ)

A woman cries at a gathering for the 30 Ethiopian victims killed by members of the militant Islamic State in Libya, in the capital Addis Ababa. (photo credit:REUTERS – via The Jerusalem Post)

A grieving woman/mother cries at a gathering for the 30 Ethiopian victims killed by members of the militant Islamic State in Libya, in the capital Addis Ababa. (photo credit:REUTERS – via The Jerusalem Post)


 
በሌላ በኩል እነዚህ አባላቶቻችን በታሰሩበት እስር ቤቶች በርካታ ወጣቶች ታስረው ይገኛሉ፡፡ በስድስተኛ ፖሊስ ጣቢያ – ካሳንቺዝ፣ አምቼ ፖሊስ ጣቢያ – ቦሌ፣ በአድዋ የካ ንዑስ ፖሊስ ጣቢያ – አዋሬ፣ በየካ ፖሊስ መምሪያ – ኮተቤ፣ ኮልፌ አካባቢ ፖሊስ ጣቢያ፣ ላንቻ አካባቢ ፖሊስ ጣቢያ – ቂርቆስ እና በሌሎች ፖሊስ ጣቢያዎች በብዙ መቶዎች የሚቆጠሩ ዜጎች መታሰራቸውንም ለማረጋገጥ ችለናል፡፡

በመሆኑም መንግስት ራሱ በጠራው ሰልፍ ላይ በነቂስ ወጥተው ተቃውሟቸውን በገለፁ ዜጎች ላይ የወሰደውን የጭካኔ እርምጃ አጥብቀን እያወገዝን የታሰሩት ዜጎችም ያለምንም ቅድመ ሁኔታ ባስቸኳይ እንዲፈቱ እንጠይቃለን፡፡

በሰልፈኞች ላይ እንግልት፣ እስርና አሰቃቂ ድብደባ የፈፀሙ እና ትእዛዝ ያስተላለፉ በሙሉ ለፍርድ እንዲቀርቡ እንጥይቃለን! የመንግስት ጽ/ቤት ኮሚኒኬሽን ጉዳዮች ባወጣው የፓርቲያችንን ስም የሚያጠፋ እና የሚወነጅል ብሎም የህዝብን ሀዘንና እና ቁጭት የሚያባብስ መግለጫም በእጅጉ ያስቆጣን መሆኑን እያሳወቅን ይህን በፓርቲያችን ላይ የተቃጣ ህገወጥ ውንጀላና የህዝብን ብሶት እና ተቃውሞ ያቃለለ ድርጊት በቀላሉ የሚታለፍ አለመሆኑን ማስገንዘብ እንወዳለን!

ኢትዮጵያ በክብር ለዘላለም ትኑር!

ሚያዝያ 14 2007 ዓ.ም
አዲስ አበባ
 
================

የአርበኞች ግንቦት 7: የአንድነትና ዲሞክራሲ ንቅናቄ ሊቀመንበር ለኢትዮጵያ ሕዝብ ያቀረቡት አስቸኳይ ጥሪ*

የተከበራችሁ ወገኖቼ፤ ከሰላሳ በላይ የሆኑ ወገኖቻችን አይ ሲስ በተሰኘ ህሊና ቢስ፣ ፀረ-ሰው እና ፀረ-ስልጣኔ ቡድን በሊቢያ በአሰቃቂ ሁኔታ የመገደላቸው መርዶ ከትናንት ወዲያ ሚያዝያ 11 ቀን 2007 ዓም ደርሶን ኢትዮጵያዊያን በያለንበት በመሪር ሀዘን ውስጥ ነን። ዛሬ “እግዜር ያጥናህ” ወይም “እግዜር ያጥናሽ” የሚባል ሰው የለም። ሁላችንም ሀዘንተኞች ነን። ካጣናቸው ቁጥራቸው በብዙ እጥፍ የሚበልጥ ወገኖቻችን አሁንም በአራዶች መዳፍ ውስጥ መሆናቸው ሀዘናችን እጅግ የበረታ ያደረገዋል። ቁጥራቸው በትክክል የማይታወቅ ሆኖም በሺህ የሚገመቱ ኢትዮጵያዊያን ዛሬም ሊቢያ ውስጥ ናቸው። በመቶ ሺህ የሚቆጠሩ ኢትዮጵያዊያን አሁንም ደቡብ አፍሪቃ ውስጥ ናቸው። ሌሎች በመቶ ሺህ የሚቆጠሩ ወገኖቻችን ደግሞ በየመን ከሰማይም ከምድርም በቦንብና በጥይት እየተማገዱ ነው።

ለምንድነው ኢትዮጵያዊያን እንዲህ እሳት ውስጥ ለመማገድ የምንደፍረው? መልሱ ግልጽ ነው። አገር ውስጥ ተስፋ የለም፤ ወያኔዎች ተስፋችንን አጨለሙት። ከሳዉዲ በመከራ የተመለሱ ወንድሞቻችን ናቸው በሊቢያ በኩል ለመሰደድ ሲሞክሩ በአይ ሲስ ተይዘው የታረዱት። ወያኔዎች አገራችንና ክብራችን ዘረፉን። ወያኔዎች ስብዕናችንን ገፈፉን።

የዘመኑ ጥቂት የህወሓት ቱጃሮች ፎቆችን እየገነቡ በነሱ መጥገብ እኛ እንድናገሳላቸው ይፈልጋሉ። የኢትዮጵያ ሕዝብ መራቡ፣ መታረዙ፣ መደህየቱ እውነት ነው፤ ሆኖም ግን “ተራብኩ”፣ “ታረዝኩ”፣ “ደኸየሁ” ብሎ መናገር አይችልም። እውነት መናገር ያስቀጣል፣ ያስወነጅላል። በፍርደ ገምድል ችሎት እውነት መናገር “ሽብርተኛ” ያስብላል። እስር ቤቶችን የተሞሉት ለእውነት፣ ለፍትህ፣ ለነፃናትና ለእኩልነት በቆሙ ሰዎች አይደለምን?

በአይ ሲስ ያሳረደን ማነው? መልሱ ለኢትዮጵያ ሕዝብ ግልጽ ነው። ያዋረደን፣ በአይ ሲስ ቢላዋ ያሳረደን ህወሓት ነው። እንደ አገርና እንደ ሕዝብ የደረሰብን ውርደት የትም ብንሄድ የምናመልጠው አልሆነም። በአገር ውስጥ የደረሰብንን ውርደት ለማምለጥ ስንሰደድ ውርደት ተከትሎን ይመጣል።

ወገኖቼ፤ ለኛ ለኢትዮጵያዊያን ከኢትዮጵያ የተሻለች አገር ሊኖረን አይችልም። ዛሬ የመሸሻ ጊዜ አይደለም። አገራችንን ከወያኔ ነጥቀን፤ በአገራችን ኮርተን በሰላም መኖር እንሻለን። ይህ መብታችን ነው። አገራችን የኛ ነች። አገራችን የጥቂት ወያኔዎች መፈንጫ አይደለችም።

ወገኔ፤ ዛሬ ሚያዝያ 13 ቀን 2007 ዓም በአርበኖች ግንቦት 7 ስም የማደርግልህ ጥሪ አድምጠኝ። በሀይማኖት፣ በብሔር፣ በጾታ ልዩነት ሳታደርግ ዛሬ በአንድነት እንደተሳህ አንድነትህን እንደጠበቅህ ቀጥል። አንድነትህን ለመሸርሸር ወያኔ የማይፈነቅለው ድንጋይ አይኖርም፤ ለወያኔ ዱለታ ጆሮህን አትስጥ። የወያኔ አገዛዝ እንዲያበቃ በአንድነት ተነስ። ዛሬ የጀመርከው ትግል እዳር ሳይደርስ እረፍት የለንም።

አርበኞች ግንቦት 7፣ ከትግራይ፣ ከኦሮሚያ፣ ከአፋር፣ ከኦጋዴን፣ ከጋምቤላ፣ ከቤሻንጉል ድርጅቶች ጋር በመጣመር የአገር አድን ኃይል የመገንባት ሥራውን እያጠናቀቀ ነው። እኛ ልጆችህ በብሔርም ሆነ በሀይማኖት ሳንከፋፈል፤ ከትግራይ እስከ ኦጋዴን፤ ከአፋር እስከ ጋምቤላ ሁሉንም የኢትዮጵያ ማኅበረሰብ ባካተተ ስብስብ ውስጥ አብረን ህወሓትን እየታገልን ነው። ይህ ትግል ግን የአንተ የኢትዮጵያ ሕዝብ ትግል ነው። የትግሉም የአገሪቷም ባለቤት አንተ ነህ። ስለሆነም ተነስ! “እንቢኝ” በል። ዘርፈ ብዙ የትግል ስልቶችን በመጠቀም ወያኔን አዳክም። የኢትዮጵያ ሕዝብ ሆይ! በትግልህ ፍሬ የአገርህ ባለቤት ሁን።

የመከላከያና የፓሊስ ሠራዊት አባላት ሆይ!እናንተ የሕዝብ አካላት ናችሁ። የደረሰብንን ብሔራዊ ውርደት እያያችሁ፤ እሮሮዓችን እየሰማችሁ በሕዝብ ላይ መተኮስ በራሳችሁ ጭንቅላት ላይ መተኮስ ማለት መሆኑን ለደቂቃ እንኳን አትዘንጉ። ይልቁኑ ዛሬውኑ ነፃነትና ፍትህ ከጠማው ወገናችሁ ጎን ቁሙ።

የኢትዮጵያ ወጣቶች፤ የወጣትነት የፈጠራ ችሎቻችሁ መፈተኛው አሁን ነው። ለእያንዳንዱ ጥቃቅን ጉዳይ መመሪያ እስኪሰጣችሁ አትጠብቁ። እያሰላችሁ፣ እያጠናችሁ፣ እያደባችሁ፣ ወያኔን ታገሉ።

የታፈረች፣ የተከበረችና የበለፀገች ኢትዮጵያን እውን እናደርጋለን።

ብርሀኑ ነጋ

የአርበኞች ግንቦት 7: የአንድነትና ዲሞክራሲ ንቅናቄ ሊቀመንበር

ሚያዝያ 13 ቀን 2007 ዓም
 
====================

*እነዚህ የፖለቲካ ድርጅቶች ያቀቧቸውን ሃሣቦች በገጻችን ላይ ስናሠፍር፡ እነዚህ ድርጅቶች ለወደፊቷ ዴሞክራሲያዊት ኢትዮጵያ ግንባታ ያላቸው ዓላማና የልብ ቃጠሎ ከሕወሃት በዓላማም በአስተሳስብም (ድርጊቱን ተውት) የላቀና የተሻሉ በመሆናቸው የመደገፍ እንጂ፡ ድርጅታዊ አባልነትን የሚያመለክት ተደርጎ መተርጎም የለበትም።
 
*Title modified.
 

%d bloggers like this: