Land grab at Lafto, Addis Abeba:       Helpless people; home demolitions & impunity of state power; police & city officials killed, injured

29 Jun

Posted by The Ethiopia Observatory (TEO)
 

 

በአዲስ አበባ ቤታቸው ይፈርስባችሁዋል የተባሉ ነዋሪዎች ባስነሱት ተቃውሞ ፖሊሶች ተገደሉ

ሰኔ ፳፪ ቀን ፳፻፰ ዓ/ም (ኢሳት ዜና):- በወረዳ አንድ በተለምዶ ቀርሳ፣ ኮንቶማ፣ ኤንቱ ሞጆ፣ ዱላ ማርያም፣ ሰፈራ፣ ማንጎ፣ ገብሬአል በሚባሉ በሺዎች የሚቆጠሩ አባወራዎችና እማወራዎች የሚኖረባቸውን አካባቢወች በማፍረስ መሬቱን ለባለሀብቶች ለመስጠት የተጀመረውን እንቅስቃሴ የተቃወሙ ነዋሪዎች ከጸጥታ ሃይሎች የተሰነዘረባቸውን ጥቃት ተከትሎ ድንጋዮችን በፖሊሶች ላይ ወረውረዋል።

የመብራት ሃይል ሰራተኞች ኮንቶማ እና ማንጎ ሰፈር በሚባለው አካባቢ የሚገኘውን የሃይል ማስተላለፊያ ትራንስፎርመር ለመንቀል ሲሞክሩ ህዝቡ ተቃውሞ አሰምቷል። በተቃውሞው 3 ፖሊሶች እና አንድ የመስተዳድሩ ሰራተኛ ሲገደሉ፣ ከ20 ያላነሱ ሰዎች ደግሞ ቆስለዋል።

የማንጎ አካባቢ ነዋሪዎች ወደ ቤተመንግስት ለተቃውሞ ቢያመሩም በፖሊሶች ታግተው ውለዋል። የቀርሳና ኮንቶማ አካባቢ ነዋሪዎች ደግሞ በተለያዩ መኪኖች ላይ ተሳፍረው ወደ ሴቶች ጉዳይ ጽ/ቤት ሲያመሩ ፖሊሶች አስቁመው ሰዎችን አስወርደው በትነዋቸዋል።

ይህ የህልውና ጉዳይ ነው የሚሉት ነዋሪዎች ፣ከዚህ በሁዋላ በጉልበት እናፈርሳለን ቢሉ ደም መፋሰስ ያስክትላል ሲሉ ያስጠነቅቃሉ። በስብሰባው ላይ የተገኙ በተለይም ከሳውዲ አረቢያ ተፈናቅለው የመጡ ዜጎች ፣ ለአመታት ደክመው ባጠራቀሙት ገንዘብ የሰሩዋቸው ቤቶች በግዴለሽነት እንዲፈርስባቸው መደረጉን በምሬት ገልጸዋል

የከተማ ልማት ሹሙ አቶ መኩሪያው ሃይሌ በአዲስ አበባ ባዶ ቦታ እየጠፋ መምጣቱን መናገራቸው ይታወቃል። በአዲስ አበባ ዙሪያ የሚገኙ አርሶአደሮችን በማፈናቀል አዲስ አበባን ለማስፋፋት የተጀመረው እቅድ ተቃውሞ ቢገጥመውም፣ የኢህአዴግ መንግስት ግን አሁንም በማፈናቀሉ ዘመቻ ቀጥሎበታል።
 


 

በአዲስ አበባ ህገወጥ ግንባታን አስመልክቶ የተጠራን ስብሰባ ያወኩ ግለሰቦች ሁለት ፖሊሶችና አንድ የወረዳ ስራ አስፈፃሚ ህይወትን አጠፉ

አዲስ አበባ ፣ ሰኔ 22 ፣ 2008 (ኤፍ ቢ ሲ) በአዲስ አበባ ከተማ በንፋስ ስልክ ላፍቶ ክፍለ ከተማ ከህገ-ወጥ ግንባታ ጋር ተያይዞ በተነሳ ረብሻ የሁለት ፖሊሶችና የአንድ የወረዳ ሥራ አስፈጻሚ ህይወት ማለፉን የአዲስ አበባ ፖሊስ ኮሚሽን አስታወቀ፡፡

ኮሚሽኑ ለፋና ብሮድካስቲንግ ኮርፖሬት በላከው መግለጫ፥ በክፍለ ከተማው ወረዳ አንድ ቀርሳ ኮንቱማ እና ማንጎ ሰፈር አካባቢ የሚካሄዱ ህገ-ወጥ ግንባታዎችን ለመለየት የወረዳው አስተዳደር ከአካባቢው ማህበረሰብ ጋር ውይይት ሲያደርግ መቆየቱን ጠቅሷል።

በዛሬው ዕለትም አስተዳደሩ ከአካባቢው ህብረተሰብ ጋር ሲወያይ የነበረበትን ስብሰባ በማወክ፥ በተነሳ ረብሻ ምክንያት በስራ ላይ የነበሩ ሁለት ፖሊሶችና የአንድ የወረዳ ሥራ አስፈጻሚ ህይወት ማለፉን የኮሚሽኑ መግለጫ ያስረዳል።

ከዚህ ባለፈም በሌሎች የአስተዳደር አካላትና የፖሊስ አባላት ላይ የአካል ጉዳት መድረሱንም ኮሚሽኑ በላከው መግለጫ አመልክቷል።

ስብሰባውን በማወክ ችግር የፈጠሩት ግለሰቦች በአካባቢው የሚገኙ መንገዶችን በመዝጋት በአካባቢው የሚደረግ እንቅስቃሴን ለማስተጓጎል ጥረት ማድረጋቸውንም ገልጿል።

ተነስቶ የነበረው ሁከት በአሁኑ ሰዓት በቁጥጥር ስር መዋሉን ጠቅሶ፥ በቀጣይ ለችግሩ ምክንያት የሆኑትን በመለየት ህጋዊ እርምጃ ይወሰዳልም ነው ያለው ፖሊስ በመግለጫው።

ህብረተሰቡ ጥያቄው በህጋዊ መንገድ የሚፈታ በመሆኑ፥ ከዚህ አልፎ በህገ-ወጥ መልኩ የሚደረግ እንቅስቃሴን ለመግታት እና የህብረተሰቡን ሠላም ለማስጠበቅ ፖሊስ አስፈላጊውን ህጋዊ እርምጃ እንደሚወስድም ነው ኮሚሽኑ የገለጸው።

መላው ህብረተሰብም ሰላም ለማስከበር በሚደረገው ጥረት፥ ለጸጥታ አስከባሪ አካላት አስፈላጊውን እገዛ በማድረግ ትብብሩን እንዲያሳይም ጠይቋል።
 

Related:

    በአዲስ አበባ በቦሌ ክፍለ ከተማ ከቤት መፍረስ ጋር በተያያዘ ሰዎች ተገደሉ፤ ብዙዎችም ቆሰሉ!

    BREAKING NEWS: Several children & adults protecting their homes from demolition shot by TPLF security forces in Bole area

    The Bole/Were Genu Massacre: Murderous TPLF regime shoots 8 Ethiopians & wounds 100 others to clear land for foreign investors

 

%d bloggers like this: