ከአማራ ክልል የተወከሉ የሕዝብ ተወካዮች ምክር ቤት አባላት የአስቸኳይ ጊዜ አዋጁን ተቃወሙ፤ቅሌታሙ ሕወሃት ግን በሙሉ ድምፅ እንዳለፈ አድርጎ በዜና አቀረበው

21 Oct

Posted by The Ethiopia Observatory (TEO)

ጥቅምት ፲ ቀን ፳፻፱ ዓ/ም ኢሳት ዜና :- ተወካዮቹ አዋጁ አፋኝ በመሆኑ በክልላችን እንዲሰራ አንፈቅድም በማለት ተቃውሞአቸውን ገልጸዋል። ተወካዮቹ የያዙትን አቋም እንዲለውጡ ከትናንት ጀምሮ በደህንነቶች ሲዋከቡ ውለዋል። ተቃውሞአቸውን ለመግለጽም የተዘጋጀላቸውን ምግብ ሳይመገቡ ቀርተዋል።

ይህ አፋኝ ህግ በክልላችን ህዝብ ላይ ተግባራዊ እንዲሆንና ከህዝብ ጋር እንድንጣላ አንፈልግም ያሉት ተወካዮቹ፣ አዋጁ እንዳይጸድቅ በጽኑ ተከራክረዋል። 137 የሚሆኑት የምክር ቤት አባላት በአንድ ድምጽ ያሳዩት ተቃውሞ ያልተጠበቀ ሲሆን፣ ትናንትና ዛሬ ከሌሎች አባላት ጋር ሳይገናኙ ለብቻቸው ተገልለው ውለዋል። “ህዝብ ሲረገጥና ሲሞት ዝም ብለን አናይም፣ የመረጠን ህዝብ የእሱን መብት ልናስጠብቅለት እንጅ በአዋጅ ልናስገድለው አይደለም” በማለት ጠንካራ አቋም መያዛቸው የአገዛዙን ከፍተኛ ሹሞች አስደንግጧል። የገዢው ፓርቲ ልሳናት ግን አዋጁ በሙሉ ድምጽ እንደጸደቀ ገልጸዋል።

አዋጁ ይፋ ከሆነበት ጊዜ ጀምሮ አገዛዙ በሙሉ ወታደራዊ ሃይሉ በመንቀሳቀስ በርካታ ዜጎችን ወደ እስር ቤት ወስዷል። በአንዳንድ ወረዳዎች ከ 1 ሺ በላይ ዜጎች ታስረው እንደሚገኙ የሚደርሱን መረጃዎች የሚያመለክቱ ሲሆን፣ ኮማንድ ፖስት የተባለው አዲሱ ወታደራዊ ገዢ ሃይል ባለፉት 3 ቀናት 1 ሺ 600 ሰዎች ብቻ መታሰራቸውን ገልጿል። ይሁን እንጅ ባለፉት 3 ቀናት በ10 ሺ ዎች የሚቆጠሩ ዜጎች መታሰራቸውን የሚደርሱን መረጃዎች ያመለክታሉ።

በኦሮምያ ክልል የኮማንድ ፖስት አባላት ሴቶችን እየደፈሩ እንዲሁም ዝርፊያ እየፈጸሙ መሆኑን የሚናገሩት ነዋሪዎች፣ ለፖሊስ ሲያመለክቱ ለ6 ወር ያክል ምንም ስልጣን ስለማይኖረን ምንም ማድረግ አንችልም የሚል መልስ እንደሚሰጣቸው ገልጸዋል። በአማራ ክልል ኮማንድ ፖስቱ የጦር መሳሪያ ለመቀማት እንቅስቃሴ በጀመረበት ወቅት ከአንዳንድ አርሶአደሮች ተቃውሞ ደርሶባቸዋል።

በጭልጋ ወረዳ ሻሀርዳ ቀበሌ ጥቅምት 14/2016 ዓም ቸሩ መንክር የተባለውን ጎልማሳ ከቤቱ ወደ ስራ ሲሄድ ገድለው ጠመንጃውን ወስደዋል ። የግለሰቡ የቀብር ስነስርዓት በማግስቱን ሸኸዲ አካባቢ የሚገኝ ማህበረ ስላሴ ገዳም ተፈፀሟል ። ጥቅምት 19፣ 2016 ደግሞ ጭልጋ ወረዳ ሻሃርዳ ቀበሌ እያዩ ተረፈ የሚባል ጎልማሳ ቤት ወታደሮቹ በምሸት ሰአት ቤቱን ሰብረው በመግባት ገለው መሳሪያውን ወሰደዋል። እያዩ በአካባቢው ህዝብ ዘነድ ከፍተኛ ከበሬታ እንደነበረው ምንጮች ገልጸዋል። በዚሁ ቀን አናጋው የተባለውን ሰው ግደለው መሳሪያውን ወስደውታል። የአካባቢውን ህዝብ ስለአንድነት በመስበክ የሚታወቅ እንደነበር የሚገለጹት የአካባቢው ምንጮች፣ የቀብር ስነስርዓቱም ዛሬ ይፈጸማል።

የኮማንድ ፖስት አባላት ነን የሚሉ ሰዎች ኢሳትንና ኦ ኤም ኤንን ታያላችሁ ያሉዋቸውን ሰዎች እየያዙ ማሰር የጀመሩ ሲሆን፣ በበርካታ ከተሞች ህዝቡ ዲሾችን እንዲያወርድ እያስፈራሩ ነው። ይሁን እንጅ ህዝቡ የተለያዩ ዘዴዎችን በመጠቀም አሁንም ኢሳትንና ሌሎች የመገናኛ ብዙሃንን መመልከቱን ቀጥሎአል። በአንዳንድ አካባቢዎች ደግሞ ህዝቡ ዲሽ አናወርድም በማለት በእምቢተኝነቱ እንደ ጸና ነው።
በሌላ በኩል ጎንደር ከተማ ውስጥ ታሰረው የነበሩ በርካታ ወጣቶች ከ5 እስከ 100 ሺ ብር የዋስትና ገንዘብ እያስያዙ እንዲወጡ ፍርድ ቤት ውሳኔ አስተላልፏል። ብዙዎቹ ወጣቶች መንገድ ላይ የታፈሱ ሲሆን፣ ምንም ወንጀል ሊገኝባቸው ባይችልም ገንዘብ አምጡና ውጡ መባላቸውን ምንጮች ገልጸዋል።
===============
 

የአስቸኳይ ጊዜ አዋጅ አፈጻጸም መርማሪ ቦርድ ተቋቋመ

አዲስ አበባ ጥቅምት 10/2009 የህዝብ ተወካዮች ምክር ቤት የአስቸኳይ ጊዜ አዋጅ አፈጻጸም መርማሪ ቦርድ አቋቋመ።

የአስቸኳይ ጊዜ አዋጅ በሚታወጅበት ወቅት የአዋጁን አፈጻፀም የሚመረምር ሰባት አባላት ያሉት መርማሪ ቦርድ እንደሚቋቋም በህገ መንግስቱ አንቀፅ 93 ንኡስ አንቀፅ 5 ተደንግጓል።

የቦርድ አባላት ከህዝብ ተወካዮች ምክር ቤትና ከህግ ባለሙያዎች የሚሰየሙ መሆኑም በግልፅ ተቀምጧል።

በዚሁ መሰረት ምክር ቤቱ ሰባት አባላት ያሉት መርማሪ ቦርድ እንዲቋቋም የቀረበለትን የውሳኔ ሓሳብ በሙሉ ድምፅ አፅድቋል።

የቦርዱ አባላት አራት ከህዝብ ተወካዮችና ሦስት ደግሞ ከህግ ባለሙያዎች ከፍተኛ የሥራ ልምድና የተሻለ የትምህርት ደረጃ ያላቸው ተመርጠዋል።

በዚሁ መሰረት ከህዝብ ተወካዮች ምክር ቤት አቶ ታደሰ ሆርዶፋ አያኔ የቦርዱ ሰብሰቢ፣ወይዘሮ ገነት ታደሰ ቸኮል የቦርዱ ምክትል ሰብሳቢ፣ ወይዘሮ ሙና አህመድ ሰኢድና ወይዘሮ ኑርያ አብዱራህማን ዑመር የቦርዱ አባል በመሆን ተሰይመዋል።

ከህግ ባለሙያዎች ደግሞ አቶ ክፍለጽዮን ማሞ ደስታ፣ሐብቴ ፊቻላ ቦንቻ እና አቶ ሰኢድ ሐሰን ፋራህ የቦርድ አባል ሆነው ተመርጠዋል።

በእለቱ የተገኙት አምስቱ የቦርድ አባላት በፌደራሉ ጠቅላይ ፍርድ ቤት ፕሬዝዳንት አቶ ዳኘ መላኩ አማካኝነት የተጣለባቸውን ሃላፊነት በአግባቡ ለመወጣት ቃለመሃላ ፈፅመዋል።

በእለቱ ያልተገኙት ሁለቱ የቦርድ አባላትም በቀጣይ ቃለ መሃላ የሚፈፅሙ ይሆናል።

የቦርዱ ዋና ፅህፈት ቤት በአዲስ አበባ ሲሆን የሥራው ባህሪ ወደ ተለያዩ ቦታዎች መሄድ ስለሚጠይቅ በክልሎች ቅርንጫፍ ፅህፈት ቤት ሊከፍት ይችላል።

ቦርዱ ለሥራው አስፈላጊ የሆኑ የሰው ኃይል፣በጀትና ጽህፈት ቤት በህዝብ ተወካዮች ምክር ቤት እንደሚሟሉለት በአዋጅ ተደንግጓል።

ቦርዱ አስፈላጊ ማስረጃና መረጃ ለመሰብሰብ፣ምርመራ ለማካሄድ፣ስለ ስብሰባ ስነ ስርዓቱ እንዲሁም ተግባርና ሃላፊነቱን ለመወጣት የሚያስችል መመሪያ ያዘጋጃል።

በአስቸኳይ ጊዜ አዋጁ ምክንያት የታሰሩ ግለሰቦችን ስም በአንድ ወር ጊዜ ውስጥ ይፋ ያደርጋል፣የታሰሩበትን ምክንያትም ይገልፃል።

በአስቸኳይ ጊዜ አዋጅ ወቅት የሚወሰዱት እርምጃዎች በማንኛውም ረገድ ኢሰብአዊ እንዳይሆኑ መቆጣጠርና መከታተልም የቦርዱ ሥልጣን ይሆናል።

ማናቸውም የአስቸኳይ ጊዜ አዋጅ እርምጃ ኢሰብአዊ መሆኑን ሲያምንበት ጠቅላይ ሚኒስትሩ ወይም የሚኒስትሮች ምክር ቤት እርምጃውን እንዲያስተካክልም ሃሳብ ማቅረብ ይችላል።

በአስቸኳይ ጊዜ አዋጅ እርምጃዎች ኢሰብአዊ ድርጊት የሚፈፅሙ ካሉ ለፍርድ እንዲቀርቡ እንዲሁም የአስቸኳይ ጊዜ አዋጅ እንዲቀጥል ለህዝብ ተወካዮች ምክር ቤት ጥያቄ ሲቀርብ ያለውን አስተያየት ለምክር ቤቱ ያቀርባል።

የአስቸኳይ ጊዜ አዋጅ ሕገ መንግስታዊ ስርአቱን፣የህዝብን ሰላምና ፀጥታ አደጋ ላይ የሚጥሉ በተለይም የኢንቨስትመንትና የልማት እንቅስቃሴን በማዳከም ላይ ያነጣጠሩ ድርጊቶች በአንዳንድ የሀገሪቷ አካባቢዎች በመፈፀማቸው መታወጁ ይታወሳል።

በአዋጁ መሰረት ማንኛውም አካል ወይም ግለሰብ ቦርዱ ለሚያከናውናቸው ተግባራት የመተባበር ግዴታ ይኖርበታል።

ቦርዱ ስራውን አስመልክቶ በየጊዜው ለህዝብ ተወካዮች ምክር ቤት ሪፖርት የሚያቀርብ ይሆናል።
 

%d bloggers like this: