ብራሰልስ በሚቀጥለው ሣምንት አትሌት ፈይሳ ሌሊሳ፣ፕሮ ብርሃኑ ነጋና መራራ ጉዲና የአውሮፓ ኅብረት በሚያካሂደው ስብሰባ ላይ በመገኘት በወገኖቻቸው ላይ እየተፈፀመ ያለውን በደል እንዲያስረዱ ተጋብዘዋል!

2 Nov

Posted by The Ethiopia Observatory (TEO)
በደረጀ ሃብተወልድ
 

የሪዮ ኦሎምፒክ የብር ሜዳሊያ አሸናፊ የሆነውና በውድድሩ ማጠናቀቂያ ላይ እጆቹን በማጣመር በወገኖቹ ላይ እየተፈጸመ ያለውን ግፍና በደል ለዓለማቀፉ ማህበረሰብ ያጋለጠው ጀግናው አትሌት ፈይሳ ሌሊሳ በሚቀጥለው ሳምንት ብራሰልስ በአውሮፓ ህብረት እንደሚገኝ ተገለጸ።

አክቲቪስት ገረሱ ቱፋ በተለይ ለኢሳት እንደገለጸው አትሌት ፈይሳ በአሜሪካ ስቴት ዲፓርትመንትና በሌሎች መድረኮች ሲያደርግ እንደቆዬው ሁሉ በመጪው ሣምንት ረቡዕ በብራሰልስ አውሮፓ ኅብረት በመገኘት በሀገሩና በወገኖቹ ላይ እየተፈጸመ ስላለው በደል ማብራሪያ ይሰጣል።

ፈይሳ በዚሁ ጉብኝቱ ከአውሮፓ ኅብረት ፓርላማ ፕሬዚዳንት ከሚስተር ማርቲን ስቹልዝና ከካቢኔያቸው ጋር የሚገናኝ ሲሆን፤ ረቡዕ ከሰዓት በኋላ ስለ ኢትዮጵያ ጉዳይ በሚሰማበት መድረክ ሀሳቡን ያቀርባል።
በዚህ የኢትዮጵያ ጉዳይ በሚሠማበት ፕሮግራም ላይ እንዲገኙ ፕሮፌሰር መረራ ጉዲናና ፕሮፌሰር ብርሃኑ ነጋ መጋበዛቸው ታውቋል።

አክቲቪስት ገረሱ ቱፋ እንዳለው የዚያኑ ዕለት ረቡዕ ምሽት በሥፍራው ለተገኙት ልዩ የመገናኛና ሃሣብ የመለዋወጫ መድረክ ተሰናድቷል።

በሚቀጥለው ዕለት ሐሙስ እንደ አውሮፓውያኑ አቆጣጠር ኅዳር 10 ቀን ከረፋዱ 11 እስከ 13 ሰዓት ድረስ በኅብረቱ ጽሕፈት ቤት ፊት ለፊት የተቃውሞ ሰልፍ እንደሚደረግ የገለጸው አክቲቪስት ገረሱ፤ ከአትሌት ፈይሳ ሌሊሳ ጋር በመሆን የወገኖቻቸውን ድምጽ ለዓለምቀፉ ኅብረተሰብ ማሰማት የሚሹ በመላው አውሮፓ የሚገኙ ኢትዮጵያውያን ሁሉ ሐሙስ ዕለት ከጧቱ 10 ሰዓት ጀምሮ በብራሰልስ የአውሮፓ ኅብረት ጽሕፈት ቤት ፊት ለፊት እንዲገኙ ጥሪ አቅርቧል።
 

%d bloggers like this: