“በተለይ ጊዜው ለትግራይ አስተማማኝ አይደለም” ሲል ብአዴን አስታወቀ

8 Feb

Posted by The Ethiopia Observatory (TEO)

የካቲት ፩ ቀን ፳፻፱ ዓ/ም (ኢሳት ዜና):- ብአዴን ሰሞኑን በክልሉ የተደረጉ ስብሰባዎችን በማስመለክት ባወጣው የማጠቃለያ ሪፖርት ላይ “ የሰላም መናጋት ለገዢው ፓርቲ አመራሮች ብቻ ሳይሆን ለሁሉም ኅብረተሰብ የሚተርፍ ነው። በተለይ ለትግራይ ጊዜው አስተማማኝ አይደለም” ሲል ገልጿል።

“የትግራይ ሕዝብ ከኢትዮጵያ ሕዝብ ጋር ማበር ካልቻለ በስተቀር፣ ጊዜው አስተማማኝ” አይደለም የሚለው ብአዴን፣ የክልሉ ሕዝብ በሕወሃት ላይ ያለውን ጥላቻ በሪፖርቱ ላይ አካቷል።

“በህዝቦች መካከል መጠራጠርን እንዲፈጠር የሚያደርጉ የጥፋት ሀይሎችን በጋራ መታገል የሁሉም ዜጋ ግዴታ ነው” የሚለው ብአዴን፣ የሰላም መናጋት ለገዥው ፓርቲ አመራሮች ብቻ ስጋት አይደለም፣ የሁሉንም ኅብረተሰብ የእለት ተእለት ኑሮ የሚያዛባ በፈለግነው ቦታ ተዘዋውረን ሰርተን መመለስ የማንችልበት እድል ይፈጠራል” ብሎአል።

ሪፖርቱ አብዛኛው የብአዴን መካከለኛና ዝቀተኛ አመራርና አባላት በሕወሃት ላይ ያላቸውን ቅሬታና ጥላቻ የሚያመልክት ነው። ከጥቂት አመራሮች በስተቀር አብዛኞቹ የብአዴን አባላት ከሕወሃት ጋር ያላቸው ልዩነት እየሰፋ በመምጣቱ በሁለቱ ድርጅቶች መካከል ተናቦ መስራት እየቀረ ነው።

በተለይ ከደኅንነት ጋር በተያያዘ በመካከለኛና ዝቅተኛ ደረጃ የሚገኙ የብአዴን የደኅንነት አባላት ከሕወሃት የደኅንነት አባላት የሚሰጣቸውን ትእዛዝ ለመቀበል ፈቃደኛ ባለመሆናቸው፣ ብዙዎቹን የአማራ ክልል የደኅንነት ስራዎች ህወሃቶች ተረክበው እየሰሩ ነው። ምንጮች እንደሚሉት በአሁኑ ሰአት በአስቸኳይ ጊዜ አዋጅ ሰበብ ህወሃት የክልሉን የደህንነት ክፍል ሙሉ በሙሉ ተቆጣጥሮታል።

ስርዓቱን ለማገልገልና ለመታዘዝ ፈቃደኛ አይደሉም የተባሉ ከባሕርዳር 11፣ ከጎንደር 13፣ ከደብረማርቆስ 9 የደህንነት አባላት ከስራቸው የታገዱ ሲሆን፣ በቦታቸው 39 የሕወሃት አባላት ሃላፊነቱን ወስደው የክትትል ስራ እየሰሩ ነው።

የአማራ ተወላጅ የደኅንነት አባላት ለመታገዳቸው ምክንያት ሆኖ የቀረበባቸው “በክልሉ ስላለው የጸጥታ ሁኔታ በየጊዜው ሪፖርት አያቀርቡም፣ በክልሉ የሚፈጸሙ ጥቃቶችን እያወቁ እንዳላወቁ ሆነው ያልፋሉ እንዲሁም የሚሰጣቸውን የክትትል ስራ በአግባቡ መስራት አይችሉም” የሚል ነው።

ከፌደራል የተላኩ የኮማንድ ፖስት አባላት ሰሞኑን ባደረጉት ግምገማ በክልሉ ያለው የጸጥታ ሁኔታ አስተማማኝ ባለመሆኑ የአስቸኳይ ጊዜ አዋጁ አይነሳ የሚል ሃሳብ ማቅረባቸውን ኢሳት መዘገቡ ይታወቃል።
 

%d bloggers like this: