የቅማንት ሕዝበ ውሳኔ ውጤት በየምርጫ ጣቢያው እየተገለፀ ሲሆን፣ በምርጫ ተሳታፊ ያልሆነው ሕዝብ እየተሳደደ ሽሽት ላይ መሆኑ ተነገረ!

19 Sep

Posted by The Ethiopia Observatory (TEO)
DW Amharic
 
በ8 ቀበሌዎች ነዋሪ የሆኑ የአማራም የቅማንትም ሕዝቦች ናቸው ድምጽ የሰጡት ።የኢትዮጵያ ብሔራዊ ምርጫ ቦርድ እንደሚለው ከ 23 ሺህ 283 ተመዝጋቢዎች መካከል 20 ሺህ 824ቱ ድምጻቸውን ሰጥተዋል
አውዲዮውን ያዳምጡ።

የቅማንት ሕዝበ ውሳኔ

በቅማንት ሕዝቦች ራስን በራስ የማስተዳደር ጥያቄ ላይ ትናንት የተካሄደው ሕዝበ ውሳኔ ውጤት በየምርጫ ጣቢያዎች ህዝብ እንዲያውቀው መደረጉን የኢትዮጵያ ብሔራዊ የምርጫ ቦርድ ዛሬ አስታወቀ ። ሆኖም አጠቃላዩ ውጤት የሕዝበ ውሳኔውን ዘገባ ቦርዱ ለኢትዮጵያ ፌደሬሽን ምክር ቤት አቅርቦ ከፀደቀ በኋላ ይፋ እንደሚደረግ ቦርዱ ለዶቼቬለ ገልጿል። በሌላ በኩል ሕዝበ ውሳኔ ታቅዶ ባልተካሄደባቸው አካባቢዎች የሚገኙ አማሮች ይፈጸምብናል ባሉት ዛቻ እና ማስፈራሪያ ወደ ጎንደር እየተሰደዱ መሆኑን ለዶቼቬለ ተናግረዋል። ስለ ተባለው ማስፈራሪያ እና ዛቻ መረጃ የለንም ያለው የአማራ ብሔራዊ ክልላዊ መንግሥት ችግር ካለም በአካባቢው አመራር ሊስተካከል ይችላል ሲል ለዶቼቬለ ገልጿል። ኂሩት መለሰ

የቅማንት ሕዝቦች ራስን በራስ የማስተዳደር ጥያቄ ላይ ትናንት ሕዝበ ውሳኔ የተካሄደው በአማራ ብሔራዊ ክልላዊ መንግሥት ሥር በሚገኙ 8 ቀበሌዎች ውስጥ ነው። በነዚሁ ቀበሌዎች ስር ባሉ 24 የምርጫ ጣቢያዎች የተሰጠው ድምጽ ተቆጥሮ ውጤቱ በሁሉም የምርጫ ጣቢያዎች ዛሬ ይፋ ተደርጓል። የኢትዮጵያ ብሔራዊ ምርጫ ቦርድ እንደሚለው ግን አጠቃላዩን ውጤት አሁን አያሳውቅም። የቦርዱ ጸሐፊና የጽሕፈት ቤቱ ዋና ሀላፊ አቶ ነጋ ዱፌሳ ምክንያቱን ለዶቼቬለ አስረድተዋል።

አቶ ነጋ የሕዝበ ውሳኔው ሂደት በጣም የተረጋጋ እንደነበር ገልጸዋል። የአማራ ብሔራዊ ክልላዊ የኮምኒኬሽን ጉዳዮች ቢሮ ሃላፊ አቶ ንጉሱ ጥላሁን ሕዝበ ውሳኔው በሠላማዊ መንገድ ነው የተካሄደው ሲሉ ለዶቼቬለ ተናግረዋል። የሕዝበ ውሳኔውን ሂደት ለመታዘብ ከሦስት ክልሎችና ከአዲስ አበባ ገለልተኛ የተባሉ ተወካዮች ተገኝተው እንደነበረ ምርጫ ቦርድ አስታውቋል። አንዳንድ ተቃዋሚ ፓርቲዎች ሕዝበ ውሳኔውን የመታዘብ እድል አልተሰጠንም ሲሉ ቅሬታቸውን ገልጸዋል። ስለ ጉዳዩ የተጠየቁት አቶ ነጋ የሚከተለውን መልስ ሰጥተዋል።

አቶ ነጋ እንዳሉት በ8ቱ ቀበሌዎች ነዋሪ የሆኑ የአማራም እና የቅማንትም ህዝቦች ናቸው ድምጽ የሰጡት ። ድምጽ ለመስጠት ከተመዘገቡት 23 ሺህ 283 ሰዎች መካከል 20 ሺህ 824ቱ ሰዎች ድምጻቸውን መስጠታቸውን አቶ ነጋ ተናግረዋል። ከዚህ ቀደም በወጣው እቅድ የአማራና የቅማንት ሕዝቦች ተቀላቅለው በሚኖሩባቸው 12 ቀበሌዎች ነበር ሕዝበ ውሳኔው ሊካሄድ የታቀደው። ሆኖም የ4ቱ ቀበሌዎች ሕዝብ በጉዳዩ ላይ የበለጠ ውይይት እንዲካሄድ በመፈለጉ ውሳኔው እንዲዘገይ መደረጉን ምርጫ ቦርድ አስታውቀዋል።

በነዚህ አካባቢዎች በተለይም በአይከል የሚገኙ አማሮች ሰዎችን አደራጅታችኋል እየተባሉ ዛቻና ማስፈራሪያ ስለ ሚሰነዘርባቸው ወደ ጎንደር እንደተሰደዱ ራሳቸውም የችግሩ ሰለባ መሆናቸው የተናገሩ አንድ ግለሰብ ለዶቼቬለ አስረድተዋል ። እኚሁ ስማቸው እንዲጠቀስ ያልፈለጉ ሰው ዛቻ እና ማስፈራሪያው የሚሰነዘረው ከቅማንት ኮሚቴ መሆኑን እና እስካሁን 43 ሰዎች መፈናቀላቸውን ገልጸዋል። ዶቼቬለ ስለ ጉዳዩ የአማራ ብሔራዊ ክልላዊ መንግሥት የኮምኒኬሽን ጉዳዮች ቢሮ ሃላፊ አቶ ንጉሱ ጥላሁንን ጠይቆ የሚከተለውን መልስ ሰጥተዋል።
ኂሩት መለሰ
ነጋሽ መሐመድ
 

%d bloggers like this: