“በአንዳንድ አካባቢዎች የተፈጠረው ግጭት በምንም መስፈርት ህብረተሰቡን የማይወክል መሆኑን መንግስት ገለፀ”!

የዘረፋ ዘመናቸው ማለቁን ሕወሃቶች በመገንዘባቸው፣ አሁንም በማስፈራራትና በማደናገር፣ ሕዝባችንን መልሰው ለማፈን፣ ለማሠቃየት፡ ለመዝረፍና ለመጨፍጨፍ ያሰሙት የአስመሳዮች ተቆርቋሪነትና የልብላ ባይ ፉከራ ስሜቱ ጎላ ያለ ነው።

ሕወሃት በዚህ መግለጫው፡ በሃገራችን ላይ ዛቻና የጦር ናፋቂነት አሰምቷል። ራሱን ብቸኛ የሃገሪቱ መንግሥትና ባለቤት አስመስሎ መቅረቡ፣ ባለፉት አራት ዓመታት የተሠጠውን የሕዝብ መልዕክት ከቁብ አለመቁጠሩን የሚያሳይ መሆኑ፡ ገና ብዙ ያዳርሳል!

በመግለጫው ውስጥ ያነሳቸው ነጥቦች፡ በፖለቲካ ዐይንና ክሕዝቡ ፍላጎትና ከሃገሪቱ መጻዒ ሁኔታ ጋር ሲነጻጸር ደካማና የራሱን የዓመታት ተጋድሎ መቁጠር የሚወድ ድርጅት በሃሣብ ድረጃም ክፉኛ መንጠፉን በሚገባ አሳይቷል!

ለምን ይሆን ሕወሃት በኢሕአዴግ ውሳኔዎች የተከፋው?

ሕወሃት ዶር ዐቢይ አሕመድ ጠቅላይ ሚኒስትር መሆንና እስካሁንም አንዱም አካሄዳቸው እንዳልጣምው ግልጽ ነው። ስለሆነም፡ በአንድ በኩል የኢሕዴግ ሥራ አስፈጻሚ ኮሜቴን ዐይን ዐይን እያየ፣በአደባባይ ጉድፍ ፍለጋ ላይ ማተኮር፤በሌላ በኩል ደግሞ ሕዝብ ለሕዝብ በነገድና ዝርያ ከፋፍሎ ማባላቱን ተያይዞታል።

የዚህም ዓላማ በሚከሰተው የሃገሪቱ መከፋፈልና መዳማት፣ የዐቢይ መንግሥት ይወድቃል የሚል ሂሣብ ሠርቷል! ይህ በኛ በኩል ያለው የድርጊቱ ትርጓሜ ነው!

እስቲ ሕወሃት በራሱ ካሠፈራቸው አንዳንዶቹን ልጥቀስ፦

“1. …ባለፈዉ የተጀመረዉ በጥልቀት መታደስ የደረሰበት ደረጃን በጥልቀት በመገምገም በሃገራችን ዋነኛ ችግር ላይ ትኩረት አድርጎ ማየት አለመቻሉ አንድ መሰረታዊ ጉድለት ነው።”

“2.  መሰረታዊ የኢኮኖሚ ችግር ዘላቂ መፍትሔ ማፈላለግ ላይ ትኩረት አድርጎ መወያየት መሆን ሲገባው: ችግሩ ባስከተላቸው ውጤቶችና ለጊዚያዊ መፍትሔዎች ቅድሚያ መስጠቱ አንድ ሌላ ጉድለት እንደሆነና፣ ዘለቂው መፍትሔ ልማታዊና ዴሞክራሲያዊ መስመራችን በግልፅ የለያቸውን የልማት አቅምቻችን ማለትም መላው ህዝባችን፣ መንግስትና የግል ባለሃብቱን በማደራጀት ርብርብ እንዲያደርጉ መቻል ላይ ያለብን ችግር ላይ ትኩረት ስጥቶ መውያየት አልቻለም።

“3.  በአሁኑ ወቅት በኢህአዴግ ደረጃ እየተደረጉ ያሉ የኢህአዴግን ህገ-ደንብ እና ተቋማዊ አስራር ያልተከተሉ የአመራር ምዳባዎች እንዲታረሙ የህወሓት ማዕከላይ ኮሚቴ ይጠይቃል።”

ለኔ ሁለቱም — ማለት ሕወሃትና ኢሕአዴግ — ምቾቴ ሆነው አያውቁም። ነገር ግን ሕወሃት 27 ዓመት ሙሉ የኢሕአዴግ መሪ ሆኖ እንደፈለገው ሲዘውር ኖሮ፡ ዛሬ በአደባባይ “ፍረዱልኝ” ማለት  እንዴት የሚያዋጣው ሆኖ እንደታየው ፈጽሞ አይገባኝም።

አሁን  ኢሕአዴግ ውስጥ ግንባር ቀደም አባል እንደመሆኑ— ነገ በኢትዮጵያውያን ላይ በፈጸማቸው ወንጀሎቹ ከመስመጥ ከተረፈ — በተራ የድርጅት አባልነቱ የኢሕአዴግን ውሣኔዎች መቃወም እንደ ድርጅት መብቱ ነው እላለሁ!

ግን ይህን በሚመለከት ሕወሃት ድርጅታዊ ውስጥ ደንብ መኖሩ ጠፍቶት አይመስለኝም በእነዚህ የደባ ጥያቄዎቹ ኢሕአዴግን የሚወነጅልበት ግድፈት ውስጥ  ራሱ የሚንበራጨቅበት?

የኢትዮጵያ ሕዝብ ሕወሃትን አንቅሮ እንደተፋው አያውቅም አልልም! ምናልባትም ሕወሃት ለግል ጥቅሙ ሟች በመሆኑ፣ ዓላማው ዶር ዐቢይ አሕመድ ላይ የሕዝብ ተቃውሞ ለማነሳሳት ያሰላ ቀቢጸ ተስፋ ሊሆን ይችላል!

“ባለፉት 27 ዓመታት በአጠቃላይ፣ ባለፉት የ17 የተሐድሶ ዓመታት ደግሞ በተለይ ዙርያ መለስ መሰረታዊ ለውጥ ማስመዝገብ ችለናል። ሃገራችን ኢትዮዽያ የነበረችበት እጅግ አስፈሪ የመበታተንና የማሽቆልቆል ጉዞ ተገቶ ወደ አዲስ ምዕራፍ እንድትሸጋገርና ስምና ክብር ከፍ ብሎ እንዲጠራ ኢህኣዲግ እልህ አስጨራሸ ትግል አካሂዷል። በተደረገዉ ትግል የሃገራችን ህዝቦች የመልማት እኩል ዕድል ያረጋገጠ ስርዓት ተገንብቶ ህዝቦችን በኢኮኖሚና በማሕበራዊ ረገድ ተጠቃሚ ማድረግ የቻለ ዉጤት ለማረጋገጥ ተችሏል። በእርግጥም አብዮታዊ ዴሞክራሲያዊ መስመራችን ሃገራችንን ከጥፋት የታደገ፣ የብሔር ብሔረሰቦች እኩልነት የተረጋገጠበት አዲሲቷ ዴሞክራሲያዊት ኢትዮጵያ እንድትፈጠር ያደረገና ለወዲፊትም የሃገራችንን ህዳሴ ለማረጋገጥ ብቸኛው መንገድ መሆኑ የእስከአሁኑ ትግላችን ያረጋገጠው እውነት ነው።”

ከላይ የተባለው መዘባተል እውነት ከሆነ፣ ለምን ሃገሪቱ ከዳር እስከዳር በአመጽ መናወጥ አስፈለጋት ለሚለው የጠላቶቹን ብዛት ይደረድርልን ይሆናል — እንደተለመደው!

========================

“በአንዳንድ አካባቢዎች የተፈጠረው ግጭት በምንም መስፈርት ህብረተሰቡን የማይወክል መሆኑን መንግስት ገለፀ”