በኦሮሚያ የተለያዩ ከተሞች የሕግ የበላይነትን ለማስከበር በተወሰደ እርምጃ 171 ተጠርጣሪዎች በቁጥጥር ሥር ዋሉ!

20 Aug

Posted by The Ethiopia Observatory (TEO)

አዲስ አበባ፣ ነሃሴ 14፣ 2010 (ኤፍ.ቢ.ሲ) በኦሮሚያ ክልል በሚገኙ የተለያዩ ከተሞች የሕግ የበላይነትን ለማስከበር በተወሰደ እርምጃ እስካሁን 171 ተጠርጣሪዎች በቁጥጥር ሥር መዋላቸው ተገለፀ።

የኦሕዴድ የገጠር ፖለቲካ አደረጃጀት ዘርፍ ሀላፊ አቶ አዲሱ አረጋ እንዳስታወቁት፥ ግለሰቦቹ በቁጥጥር ስር የዋሉት በተለያዩ ሕግ ወጥ ተግባር ላይ ተሰማርተው ሲንቀሳቀሱ ነው።

በዚህ መሰረትም ሱሉምታ ከተማ በቄሮ ስም በመንቀሳቀስ የግለሰብ ሰዎችን ቤት በማፍረስ የቤት ክዳን ቆርቆሮ በመስወድ ላይ እያሉ 4 ሰዎች እጅ ከፍንጅ ተይዘዋል ብለዋል አቶ አዲሱ።

በሻሸመኔ ከተማም ባለፈው ሳምንት በከተማዋ ከተፈፀመው ወንጀል ጋር ተያያዥነት አላቸው ተብለው የተጠረጠሩ 7 ሰዎች በቁጥጥር ስር መዋላቸውንም አስታውቀዋል።

በቡራዩ ከተማ በቄሮ ስም ሲነግድ የነበረና የቄሮ ሊቀመንበር እኔ ነኝ በማለት ራሱን በመሰየም መታወቂያ በማዘጋጀትና የቅርብ ተጠሪውን የከተማዋን ፖሊስ አዛዥ ስም በመፃፍ የተለያዩ ተቋማት ስፖንሰር እንዲያደርጉት ሲያስገድድ የነበረ፤ እንዲሁም በቄሮ ስም ቲተርና ማሕተም በማስቀረፅ የቄሮ መታወቂያ በማሳተም ሲሸጥ የነበረ አንድ ግለሰብ በቁጥጥር ስር ውሏል ብለዋል አቶ አዲሱ።

Credit: Fana

በለገ ጣፎ ለገ ዳዲ ከተማ የ62 ወጣቶችን በማዘጋጀትና ፎቶ ግራፋቸውን ወረቀት ላይ በማሳተም፤ ይህ የቄሮ አደረጃጀት ከቀበሌ እስከ ክልል ድረስ ዕውቅና ማግኘት አለበት በማለት ወጣቶችን ሲያነሳሱና ሲያሳስቱ የነበሩ 2 ግለሰቦች በቁጥጥር ሥር ውለዋል።

በጅማ ከተማም በህገ ወጥ ሥራ ላይ የተሰማሩ፣ሕገ ወጥ ግንባታ የገነቡ እና ያስገነቡ እንዲሁም የመንግስትን ስራ ሲያደናቅፉ የነበሩ 42 ሰዎች በቁጥጥር ስር ውለዋል ያሉት አቶ አዲሱ፥ ከእነዚህ ውስጥ 8 ሰዎች ላይ ማስረጃ ተደራጅቶ ክስ ሊመሰረትባቸው በሂደት ላይ ይገኛል ብለዋል።

በተጨማሪም ሁለት ሽጉጦችና ከ180 በላይ ሕገ ወጥ ጥይቶች መያዛቸውን አስታውቀዋል።

በአዳማ ከተማም በከተማዋ በቅርቡ ተፈጥሮ ከነበረው ግጭት ጋር በቀጥታም ይሁን በተዘዋዋሪ ግንኙነት ነበራቸው ተብለው የተጠረጠሩ 8 ግለሰቦች በቁጥጥር ሥር ውለዋል።

በሞጆ ከተማም ጨለማን ተገን በማድረግ ፋብሪካ ለመዝረፍ ሲንቀሳቀሱ የነበሩ 2 ግለሰቦች በቁጥጥር ሥር መዋላቸውን አስታውቀዋል አቶ አዲሱ።

በሰበታ ከተማ ደግሞ ሕገ ወጥ ግንባታ ያካሄዱ፣  ምግብ ቤት ገብተው ተጠቅመው አንከፍልም የሚሉ፣ ተደራጅተው በመንቀሳቀስ ሕግ አስከባሪ አካላት ሲናገሯቸው ሲደበድቡ የነበሩ 14 ግለሰቦችም በቁጥጥር ስር ውለዋል ሲሉ አቶ አዲሱ ገልፀዋል።

በምስራቅ ሸዋ ዞን ሉሜ ወረዳ በቄሮ ስም በመሬት ወረራ ላይ የረሳተፉ 32 ተጠርጣሪዎች በቁጠጥር ሥር የዋሉ ሲሆን፥ ከእነዚህም ውስጥ 2 ተጠርጣሪዎች የአዳማ ከተማ መሃንዲሶች የነበሩና በሥነ ምግባር ችግር የተባረሩ ናቸው።

በተመሳሳይ በፈንታሌ ወረዳ የብሄር ግጭት እንዲቀሰቀስ ቅስቀሳ ሲያደርጉ የነበሩና ከዚህም በማለፍ የመንግስት መስሪያ ቤት ድረስ በመሄድ የስራ ሀላፊዎችን የደበደቡ 4 ተጠርጣሪዎችም በቁጥጥር ሥር ውለዋል።

በተጨማሪም በቦረና ወረዳ መንገድ በመዝጋት አመፅ ለማነሳሳት ሞክረዋል የተባሉ 55 ተጠርጣሪዎች በቁጥጥር ሥር ውለው ጉዳያቸው እየተጣራ መሆኑንም አቶ አዲሱ አክለው ገልፀዋል።

ተዛማጅ:

ጠቅላይ ሚኒስትር ዶ/ር ዐብይ አሕመድ:    “መንግሥት እንደ ዕሴት የሚያራምደው ነጻነት፣ሰላምና ማኅበረሰባዊ ብልጽግናን የማረጋገጥ ራዕይ ሕገ ወጥነትንና አመጽን የማይታገስ ነው !”

%d bloggers like this: