የህዳሴ ግድብ ተደራዳሪዎች ጫና እንደነበረባቸው በውይይት መድረክ ላይ ገለጹ

20 Feb

Posted by The Ethiopia Observatory (TEO)

የህዳሴ ግድብ የውኃ አሞላልና አለቃቀቅን በተመለከተ እየተደረገ በሚገኘው ድርድር ጫና እንደ ደረሰባቸው ኢትዮጵያን ወክለው የሚደራደሩት የሕግና የቴክኒክ ባለሙያዎች፣ በጠቅላይ ሚኒስትር ጽሕፈት ቤት በበተደረገ የውይይት መድረክ ላይ ገለጹ።

ሰኞ የካቲት 9 ቀን 2012 ዓ.ም. በጠቅላይ ሚኒስትር ጽሕፈት ቤት አዳራሽ በተካሄደው የውይይት መድረክ ላይ የተገኙት የኢትዮጵያ ተደራዳሪ ቡድን አባላት፣ በአሜሪካና በዓለም ባንክ አመቻችነት የህዳሴ ግድቡን የውኃ አሞላል አስመልክቶ እየተካሄደ የሚገኘው ድርድር፣ ኢትዮጵያን የሚጠቅም ሂደት ነው ብለው እንደማያምኑ መናገራቸውን የሪፖርተር ምንጮች ገልጸዋል።

ውይይቱን እንዲከታተሉ የተወሰኑ የመንግሥት የመገናኛ ብዙኃን ብቻ ተጠርተው የነበረ ቢሆንም፣ ውይይቱ ከተጀመረ በኋላ የውይይቱን ይዘቶች እንዳያስተላልፉ መመርያ እንደተሰጣቸው ተሰምቷል።

ጠቅላይ ሚኒስትሩ የውይይት መድረኩን ከከፈቱ በኋላ ጥሪ እንደ ተደረገላቸው ሌሎች ተሳታፊዎች በታዳሚነት የተከታተሉ መሆኑን የገለጹት ምንጮች፣ መድረኩ ከተከፈተ በኋላም የውሃ፣ መስኖና ኢነርጂ ሚኒስትሩ ስለሺ በቀለ (ዶ/ር) ሁለት ሰዓት የፈጁ የድርድሩን ሂደትና ይዘት የተመለከቱ የቴክኒክና የሕግ ጉዳዮች ላይ ገለጻ ማድረጋቸውን ምንጮች ለሪፖርተር ጠቁመዋል። ሚኒስትሩ ገለጻቸውን ካጠናቀቁ በኋላ የኢትዮጵያ ተደራዳሪ ቡድን አባላት አስተያየት እንዲሰጡ መጋበዛቸውን፣ የድርድሩ ሂደትም በአሜሪካ መንግሥት በተወከሉ ታዛቢዎች ጫና ይደረግባቸው እንደነበር ይፋ ማድረጋቸውን ምንጮች ገልጸዋል።

የአሜሪካ መንግሥትን ወክለው ድርድሩን የሚታዘቡ ኃላፊዎች በተለያዩ አጋጣሚዎች፣ ‹‹ኮንሲኩዌንስ (ችግር) ያመጣባችኋል›› በማለት በኢትዮጵያ ቡድን አባላት ላይ ጫና ያደርጉ እንደነበር፣ በግልጽ ለመድረኩ መናገራቸውን ምንጮች አስረድተዋል።

በዚህና መሰል ጉዳዮች ምክንያትም የግብፅ ተደራዳሪዎች የዐባይ ውኃን በተመለከተ፣ ግብፅ ዳግም የበላይነት መቆጣጠር እንዳለባት የሚያመላክቱ አቋሞችን ያራምዱ እንደነበር፣ ተደራዳሪዎቹ ለመድረኩ እንዳስረዱ ከምንጮቹ ገለጻ ለመረዳት ተችሏል።

በግብፅና በኢትዮጵያ ተደራዳሪዎች መካከል መጥበብ ያልቻሉ የልዩነት ነጥቦች ናቸው ያሏቸውን ለመድረኩ ያቀረቡ ሲሆን፣ ኢትዮጵያ ወደ ዳሴ ግድቡ የሚመጣውን የጥቁር ዐባይ የውኃ መጠን መሠረት ያደረጉ ነጥቦችን ስታነሳ፣ የግብፅ ተደራዳሪዎች ግን የጥቁር ባይ አጠቃላይ የተፈጥሮ ፍሰትን የድርደሩ መሠረት በማድረግ የግድቡ አሞላል እንዲወሰን መጠየቃቸውን፣ የኢትዮጵያ ተደራዳሪዎች በዋነኝነት ማንሳታቸውን ከምንጮች ለመረዳት ተችሏል።

በዚህም ምክንያት እየተደረገ ያለው ድርድር ኢትዮጵያን የሚጠቅም ደት ነው ብለው እንደማያምኑ ለመድረኩ እንዳስታወቁ ምንጮቹ አስረድተዋል። የውይይት መድረኩ ለግማሽ ቀን ብቻ የተያዘ በመሆኑ ሌሎች ጥሪ የተደረገላቸው ምሁራን፣ ሚኒስትሮችና ታዋቂ ሰዎች ጥያቄዎችን እንዳላነሱ ነገር ግን ውይይቱ ከቀናት በኋላ በዝርዝር ጉዳዮች ላይ በስፋት እንዲቀጥል መወሰኑን ገልጸዋል።

የው፣ መስኖና ኢነርጂ ሚኒስትሩ ስለሺ (ዶ/ር) ከሳምንት በፊት ሰጥተውት በነበረ ጋዜጣዊ መግለጫ ላይ በድርድሩ ጫና ተሰምቷቸው እንደሆነ ቀርቦላቸው ለነበረ ጥያቄ፣ ‹‹አዎ፣ ጫናዎች መኖራቸው አይቀርም። ጫናዎች በእኛ ተደራዳሪዎች ላይ ነበሩ፣ በሌሎች አገሮች ተደራዳሪዎች ላይም ነበሩ፤›› የሚል ምላሽ ሰጥተው ነበር።

ለሥራ ጉብኝት ወደ ኢትዮጵያ የመጡት የአሜሪካ የውጭ ጉዳይ ሚኒስትር  ማይክ ፖምፒዮ ከኢትዮጵያ አቻቸው አቶ ገዱ አንዳርጋቸው ጋር በመሆን ማክሰኞ የካቲት 10 ቀን 2012 ዓ.ም. በሰጡት መግለጫ፣ የዳሴ ግድብ ድርድርን በተመለከተ አገራቸው ጣልቃ እንደማትገባና ሦስቱም ተደራዳሪ አገሮች ልዩነቶቻቸውን በራሳቸው መንገድ እንዲፈቱ እንደምትፈልግ ገልጸዋል።

/ሪፖርተር

 

 

%d bloggers like this: