Tag Archives: Economic growth & döevelopment

ዕድገቱ አብዛኛውን ኅብረተሰብ ተጠቃሚ የሚያደርግ መሆን አንዳለበት ተ.መ.ድ. ጠቆመ—የሕወሃት የዘረኝነትና ዘረፋ ቅርስ!

19 Dec

Posted by The Ethiopia Observatory (TEO)

በኢትዮጵያ ላለፉት ሁለት ቀናት ጉብኝት ያደረጉት የመንግሥታቱ ድርጅት የልማት ፕሮግራም ዋና አስተዳዳሪ አቺም ስቴነር ከኢዜአ ጋር ባደረጉት ቆይታ ኢትዮጵያ በተለይ ካለፉት ጥቂት ዓመታት ጀምሮ ጠንካራ የሚባል አጠቃላይ አገራዊ ዕድገት እያመጣች መሆኑን ጠቅሰው ይህ ዕድገት ግን አብዛኛውን ዜጋ ተጠቃሚ የሚያደርግ ሊሆን ይገባል ብለዋል።

በአሁኑ ወቅት በኢትዮጵያ በሚታየው የልማት ጎዳናና በዚህ ዓመት የተጀመረው አጠቃላይ አገራዊ የለውጥ ሂደት አማካኝነት አገሪቱ በመጪዎቹ ጥቂት ዓመታት ውስጥ አብዛኛው ዜጋ ተጠቃሚ የሚሆንበትንና ዘላቂነት ያለውን የምጣኔ ኃብት የምታረጋግጥበት ይሆናል የሚል ተስፋ እንዳላቸው ዋና አስተዳዳሪው ገልፀዋል።

የልማት ፕሮግራሙ ላለፉት አራት አስርት ዓመታት የኢትዮጵያ የልማት አጋር ሆኖ ሲሰራ መቆየቱን የገለፁት ሚስተር ስቴነር ወደፊትም ይህንኑ አጠናክሮ እንደሚቀጥል አረጋግጠዋል።

አገሪቱ “ዘላቂ የልማት ግቦች” በሚል በመንግሥታቱ ድርጅት የተቀየሰውን የልማት መርሃ ግብር ለማሳካት የበኩለሏን ጥረት እያደረገች መሆኑንም አስታውቀዋል።

አክለውም “የተባበሩት መንግሥታት የልማት ፕሮግራምን ጨምሮ የተለያዩ የመንግሥታቱ ድርጅት አካላት በዓለም አቀፉ የዘላቂ ልማት ግቦች አቅጣጫ መሰረት በኢትዮጵያ እየተንቀሳቀሱ ነው፤ የልማት ግቦቹ ኢትዮጵያ ከያዘቻቸው አገራዊ የልማት ዕቅዶችና የትኩረት አቅጣጫዎች  ጋር ከፍተኛ መጣጣም አላቸው፤ በመሆኑም በዚህ ረገድ የልማት ፕሮግራሙ የሚሰጠውን ድጋፍ ማጠናከር በሚችልበት መንገድ ላይ እንደገና እያሰበ ነው” ብለዋል።

የመንግሥታቱ ድርጅት የልማት ፕሮግራም ዋና አስተዳዳሪ በኢትዮጵያ በአሁኑ ወቅት የተጀመረውን ሁለንተናዊ የለውጥ ሂደት አድንቀዋል።

እየተካሄደ ያለው ለውጥ በተለይ በአፍሪካ ቀንድ ጠንካራ የምጣኔ ሃብት ዕድሎች እንዲፈጠሩ ከፍተኛ ሚና ይኖረዋል ብለዋል።

የኢትዮጵያ መንግስት የጀመረው ሁለንተናዊ የለውጥ ሂደት የሚፈለገው ደረጃን ይቀዳጅ ዘንድ የተባበሩት መንግሥታት የልማት ፕሮግራም  ተገቢውን ድጋፍ እንደሚያደርግም ቃል ገብተዋል።

የተባበሩት መንግሥታት የልማት ፕሮግራም ዋና አስተዳዳሪ በኢትዮጵያ ቆይታቸው ጠቅላይ ሚኒስትር ዶክተር ዐብይ አሕመድን ጨምሮ ከሌሎች ከፍተኛ የመንግሥት ባለስልጣናት ጋር በጋራ ጉዳዮች ላይ መክረዋል።

%d bloggers like this: