Tag Archives: low pay

Mining giant Bilton voids contract in Afar, Ethiopia; more Ethiopian professionals at Ministry of Mines also quitting

17 Jun

ከዓለም ግንባር ቀደም የማዕድን ኩባንያ የሆነውና በአፋር ክልል በፖታሽ ማዕድን ፍለጋ ሥራ ላይ የተሰማራው ቢኤችፒ ቢሊተን የተሰኘው ግዙፍ የአውስትራሊያ ኩባንያ የጀመረውን ሥራ አቋርጦ ከኢትዮጵያ ሊወጣ ነው፡፡

ቢኤችፒ በአፋር ክልላዊ መንግሥት ከፍተኛ የፖታሽ ማዕድን በሚገኝበት በዳሎል አካባቢ የፖታሽ ማዕድን ፍለጋ ሥራ ለማካሄድ ከማዕድን ሚኒስቴር ጋር በገባው ውል መሠረት፣ ላለፉት ሦስት ዓመታት በተጠቀሰው አካባቢ የፖታሽ ማዕድን ፍለጋ ሥራ ሲያካሄድ ቆይቷል፡፡ ኩባንያው እጅግ ዘመናዊ የሆኑ የተለያዩ የከርሰ ምድር ጥናቶች ያካሄደ ሲሆን፣ በዳሎል አካባቢ የሚገኘውን የፖታሽ ክምችት መጠን ለማረጋገጥ የተለያዩ ጉድጓዶች ቆፍሯል፡፡

የሪፖርተር ታማኝ የዜና ምንጮች እንደገለጹት፣ ኩባንያው ወደ ምርት ሥራ ይገባል ተብሎ ሲጠበቅ ባልተጠበቀ ሁኔታ ሥራውን አቋርጦ ለመውጣት መወሰኑን ለማዕድን ሚኒስቴር ኃላፊዎች በቅርቡ አስታውቋል፡፡ ኩባንያው ውሳኔውን በጽሑፍ ለሚኒስቴር መሥሪያ ቤቱ አሳውቆ የመልቀቂያ ሥራዎችን በማከናወን ላይ እንደሆነ ምንጮች ገልጸዋል፡፡ በዳሎል አካባቢ ከ160 ሚሊዮን ቶን በላይ የሚገመት የፖታሽ ክምችት እንደሚገኝ ጥናቶች ይጠቁማሉ፡፡ ፖታሽ ለማዳበሪያ መሥሪያ የሚያገለግል ጠቃሚ ማዕድን ነው፡፡

በዳሎል አካባቢ የፖታሽ ማዕድን ለማልማት ከሚንቀሳቀሱ ስድስት ኩባንያዎች መካከል ሳይኒክ የተሰኘው የህንድ ኩባንያ፣ አላና ሪሶርስ የተባለው የካናዳ ኩባንያና ቢኤችፒ በቀዳሚነት የሚጠቀሱ ናቸው፡፡

ቢኤችፒ ሥራውን አቋርጦ ለመውጣት የወሰነበት ምክንያት ግልጽ አይደለም ያሉት ምንጮች፣ ዜናው ለሚኒስቴር መሥሪያ ቤቱ ትልቅ መርዶ ነው ብለዋል፡፡ በጉዳዩ ዙሪያ አስተያየት እንዲሰጡን የማዕድን ሚኒስቴር ኃላፊዎችን በተደጋጋሚ ብንጠይቅም ምላሽ ማግኘት አልቻልንም፡፡

የማዕድን ሚኒስቴር ባለሙያዎች ከደመወዝ ክፍያና ከአስተዳደር (ማኔጅመንት) ጋር የተያያዙ ቅሬታዎች በማሰማት ሥራቸውን እየለቀቁ ይገኛሉ፡፡ በዚህም የተነሳ የሚኒስቴር መሥሪያ ቤቱ ከፍተኛ የባለሙያዎች ችግር የገጠመው ሲሆን፣ አዲስ የማዕድን ፍለጋ ፈቃድ ማመልከቻ መቀበል ካቆመ አንድ ዓመት ሊሞላው እንደሆነ ለማወቅ ተችሏል፡፡

(Source: The Reporter)

Transforming Ethiopia TE

%d bloggers like this: