Tag Archives: Oromo Democratic Party (ODP) pretensions

መንግስት ሲደናበር ለውጡ ነውጥ እንዳይወልድ!

8 Mar

Posted by The Ethiopia Observatory (TEO)

ከገዠው ፓርቲ አባል ድርጅቶች እየወጡ ያሉት መግለጫዎች ሥርዓቱ ከራሱ ጋር እየተቃረነና ለነውጥ ኃይሎችም ሁኔታዎችን እያመቻቸ ይመስላል።

+ የአማራ ክልልና የትግራይ ክልል መንግሥታት ትላንትናና ዛሬ የተወነጫጨፉት የመግለጫ ተኩስ እንዲህ በቀላሉ የሚታለፍ አይደለም። ክልሎቹ ለጦርነት መዘጋጀታቸውን አንዱ ሌላውን በሚከስበት መግለጫቸው ገልጸዋል። ከመግለጫም አልፎ መሬት ላይ በግልጽ በሚታይ መልኩ ወታደራዊ ዝግጅቶች እየተደረጉ ነው።

+ ሌላው አስደማሚ መግለጫ ደግሞ ዛሬ ማምሻውን ኦዴፓ ያወጣው ማስጠንቀቂያና ዛቻ አዘል መግለጫ ነው። መግለጫው የአዲስ አበባ መስተዳድርንና የፌደራል መንግሥቱን የሚያስጠነቅቅ ይመስላል። የኦዴፓ መግለጫ የበለጠ ትኩረት የሚስበው የድርጅቱ ሊቀመንበር የሆኑት ጠቅላይ ሚኒስትሩ በፌደራል መንግሥት ከሚያራምዱት አቋም ጋር የሚጣረስ የሚመስለውን የፓርቲያቸውን መግለጫ እንዴት ያዩታል የሚለው ነው። ተስማምተውበታል ወይስ ባላየ ችላ በለው ያልፉታል ወይስ የተለየ ቋም አላቸው የሚለው ግልጽ አይደለም።

+ ሌላው መግለጫ በአዲስ አበባ ጉዳይ አዴፓና ኦዴፓ እጅግ የሚጣረስ አቋም የተንጸባረቀበት መግለጫ ማውጣታቸው እና አዴፓም ጥብቅ ማሳሰቢያ መስጠቱ ነው።

<!–read more–>



እነዚህ የክልል መንግሥታት እርስ በእርሳቸው እና ከማዕከላዊ መንግሥቱ ጋር የሚቃረኑ እና የሚጋጩ መግለጫዎችን ከየአቅጣጫው ማውጣታቸው ለውጡን ተስማምተው በጋራ እየመሩ አለመሆኑን ነው የሚያመላክተው። ወይም በጋራ ተስማምተውና አቅደው እየተጓዙ አይደለም። ይህ ዐይነቱ ችግር ደግሞ ሳይዘገይ መፍትሔ ካልተበጀለት አገሪቱን ወዳልተፈለገ ግጭት ይከታታል የሚል ሥጋት በብዙዎ ዘንድ ተፈጥሯል።

የእነዚህ ኃይሎች በዚህ ደረጃ በአደባባይ መወንጃጀልና መፍረክረክ ለሌሎች በነውጥ ጉዳያቸውን ማስፈጸም ለሚፈልጉ ጽንፈኛ ኃይሎች ጉልበት ሊፈጥርላችው ይችላል የሚል ሥጋትም አለ።

በመንግሥት ኃይሎች በኩል ሳይዘገይ ሊከወኑ የሚገባቸው ነገሮች ብዮ የማስበው፤

+ ሁሉም የክልል አካላት ከሚያወጧቸው መግለጫዎችና የሚዲያ ንትርክ ታቅበው ችግሮቻቸውን በጠረጴዛ ዙሪያ ለመፍታት ባፋጣኝ መቀመጥ ካልቻሉ፤

+ አወዛጋቢ በሆኑት እንደ አዲስ አበባ የባለቤትነት ጥያቄ እና ሌሎች የግጭት መንስዔ በሆኑ ጉዳዮች የጋራ አቋም ወይም በነዚህ ነጥቦች ዙሪያ ያሉትን ችግሮች ሊፈቱ በሚችሉበት አግባብ ላይ አንድ አይነት ስምምነት ላይ ካልደረሱ፤

+ በአገሪቱ ጎልቶ እየታየ ያለውን ሕገ ወጥነትና የተወሰኑ ቡድኖች ከሕግ በላይ በመሆን ዜጎችን ማስፈራራትና ሥጋት ውስጥ እየጣሉ ያለበትን ሁኔታ በአፋጣኝና በሕግ አግባብ ማስቆም ካልቻሉ፤

+ በተለያዩ ሚዲያዎችና በአደባባይ በግልጽ ቋንቋ ሕዝብን ለእርስ በእርስ ግጭት የሚቀሰቅሱ፣ ዜጎች ሕግ እንዳያከብሩ የሚያነሳሱ ሰዎችን እንዲታቀቡ መምከርና መገሰጽ ካልቻሉ፤

+ በአገሪቱ ውስጥ እየተካሄደ ያለውን ሕገ ወጥ የመሳሪያ ዝውውር መግታትና የታጠቁ ግለሰቦችም መሳሪያቸውን እንዲያስመዘግቡ፣ እንዲሁም በአደባባይ መሳሪያ እያነገቡ (ሜጫንም ይጨምራል) ሕዝብ በተሰበሰበበት ስፍራ መንቀሳቀስም ሆነ አደባባይ መውጣትን አጥብቀው ካልከለከሉ እና ይህን በሚተላለፉ ሰዎች ላይ አፋጣኝ ሕጋዊ እርምጃ የማይወስዱ ከሆነ፤

+ አገሪቱ እስክትረጋጋ ድረስ ከልማት ጋር በተያያዘ ዜጎችን ስጋት ላይ የሚጥሉ የቤቶች ማፍረስ ወይም ማፈናቀልም ሆነ የማስፈር ስራዎችን ለጊዜው መግታት እና ነገሮችን እንደገና በጥናት እና ጥንቃቄ በተመላው መልኩ ማከናውን ካልቻሉ፤

+ የድንበርም ሆነ የማንነት ጥያቄ በተነሳባቸው ሥፍራዎች ላይ ያለውን ውጥረት ለማርገብ ላልተወሰነ ጊዜ አካባቢዎቹን ከክልል አስተዳደር ነጻ አድርጎ ችግሮቹ በሕግና በፖለቲካ ድርድር እስኪፈቱ ድረስ ነጻ ቀጠና ሆነው በፌደራል መንግስቱ ቁጥጥር ስር እንዲቆዩ እና የክልል ታጣቂዎች ከአካባቢዎቹ ገለል ብለው እንዲቆዩ እና በምትካቸው የፌደራል የጸጥታ ኃይል እንዲሰፍር ካልተደረገ፤

አገሪቱ ዳግም ወደ ፖለቲካ አለመረጋጋት እና እርስ በርስ ግጭት ልታመራ ትችላለች። ይህ ችግር የሚያሳስባቸው የፖለቲካ ድርጅቶች፣ የሲቪክ ማህበራት፣ የሃገር ሽማግሌዎች፣ ምሁራን እና የመብት አቀንቃኞች በእነዚህ ዙሪያ ያላቸውን ስጋት በጋራ በመግለጽ መንግስት ለጉዳዩ አፋጣኝ እና አግባብነት ያለው ምላሽ እንዲሰጥ ማሳሰብ ይኖርባቸዋል። ማሳሰብ ብቻ ሳይሆን ችግሩን ለመፍታትም አብረው ሊሰሩ ይገባል።

በፉክክር ስሜት ተወጥረን ነገሮችን በማራገብ ወይም የሌላውን ጩኸት ችላ በማለት ወይም ማዶና ማዶ ቆሞ በመናቆር አገርን መታደግ አይቻልም። የተፈጠሩት መልካም እድሎች እንዳይጨናፉና አገር በጮሌዎች እና በጠባብ ዘረኞች እጅ ወድቃ ወደ ሌላ የመከራ እና የግፍ ዘመን እንዳናመራ ከወዲሁ ሁሉም የድርሻውን ሊወጣ ይገባል።

ቸር ያሰማን!

 

/መንግስት ሲደናበር ለውጡ ነውጥ እንዳይወልድ!

 

ያሬድ ኃይለማርያም *

*የኢትዮጵያ ሰብዓዊ መብቶች ማኅብር ሥራ አስፈጻሚ

 

 

%d bloggers like this: